Covalima – Estudante sira hosi Eskola Téknika Vokasionál (ESTV) Claret Salele konsidera atividade Chega! Tour importante tanba sira bele rona istória no haree fatin akontese masakre Nikir-Hatu-metan, Suku Beiseuk, Postu Administrativu Tilomar, Munisipiu Covalima.
Estudante, Aurelia dos Reis Amaral informa, sente kontente tebes ba programa Chega! Tour ne’ebé organiza hosi Centro Nacional Chega!I.P tanba bele lori sira vizita fatin akontese masakre no rona istória direita hosi sasin sira.
“Hanesan estudante ida hosi eskola ESTV Claret Salele sente kontente tebes tanba bele partisipa programa Chega! Tour hodi vizita fatin akontese masakre ne’e”, dehan estudante Aurelia ba Media Chega! iha Suku Beiseuk-Tilomar, Sexta-feira (23/04/2022).
Aurelia haktuir, bainhira sasin sira konta sira nia istória pasadu, soke tebes nia fuan halo matanbeen monu. Se nia (estudante) mak iha momentu ne’ebá hasoru problema ida ne’e, iha dalan rua de’it mate ka moris.
“Hau sente triste tanba rona istória ne’e sadis no soke los ita nia fuan. Ita hetan ukun rasik-an, ita nia avo sira luta ba rai ida ne’e, sira oferese sira nia-an ba mate, ohin loron nasaun Timor-Leste hetan independénsia”, estudante Aurelia espresa sentimentu ho mataben.
Istória ne’ebé vitima sira konta ne’e importante tebes ba estudante sira hodi aprende kona-ba oinsá sira nia luta ba ukun rasik-an. Ohin loron povu Timor-Leste hetan ukun rasik-an la’os ema entrega mai ita maibé liuhosi terus no susar oin-oin.
Estudante, Basilio Noronha reforsa, hanesan estudante sente kontente hodi partisipa iha atividade Chega! Tour no konsidera atividade ne’e di’ak tanba bele vizita fatin akontese masakre no rona istória hosi sasin sira.
“Hanesan estudante hau sente kontente tanba ami bele rona direita istória hosi sasin sira kona-ba akontesimentu no ami bele hatene ona masakre ida ne’e”, estudante apresia.
No nia konsidera katak, istória ne’e importante tebes tanba ita bele hatene. Ita nia nasaun hetan independénsia akontese masakre oin-oin tanba ne’e husu ba estudante sira tenke aprende istória tanba istória hanesan aliserse ba dezenvolvimentu nasionál.
“Hau nia rekomendasaun ba Centro Chega! atu nafatin implementa atividade Chega! Tour atu nune’e ami estudante sira bele hatene”, estudante Basilio rekomenda.
Masakre Nikir-Hatu-metan, Suku Beiseuk, Postu Administrativu Tilomar, Munisipiu Covalima akontese tanba Milisia Pro-integrasaun Laksauk hamutuk ho militar Indonézia oho Timor-oan na’in lima (5) mak hanesan; – Aleixo Ximenes, Tomas Cardoso, Paulos Ximenes, Ludufiku Rabu no Bendito do Nacimento.
Media Chega!
