Sítiu Istóriku Eis Sede Tonsus Laclubar jográfikamente lokaliza iha Aldeia Torilaran, Suku Orlalan, Postu Administrativu Laklubar, Munisípiu Manatuto (Agora dadaun fatin ne’e sai hanesan propriedade privadu no okupa nu’udar Rezidénsia Parókia Laclubar).
Iha tinan 1979, bainhira baze de apoiu rezisténsia naksobu tanba operasaun serku no aniquilamentu husi Militár Indonézia, populasaun ne’ebé reziste hamutuk iha baze de apoiu komesa halai namkari, balun tuun mai rende no balun Militár Indonézia kaptura. Ho situasaun ida ne’e, Militár Indonézia sira aproveita detein no tortura populasaun sivíl sira ne’ebé foin rende no mós sira kaptura iha fatin ne’e.
Forma tortura ne’ebé militár Indonézia halo hasoru dadur sira mak baku dadur sira nia isin lolon iha semana ida nia laran.
Iha Fevereiru 1979, Militár Indonézia husi Pelotaun Tonsus (Peleton Khusus) kaptura ema na’in 11 ne’ebé kompostu husi Manuel Carlos, Lekihonik, Pinto, Raimundo de Oliveira, Armando Soares, Mali Aru, Miguel Daholo, Graciano Bere Mauk, Martinho no Mau Leki, inklui sasin refere, hodi ba tortura iha fatin ne’e, durante semana ida nia laran.
Hafoin halo tortura, membru husi Pelotaun Tonsus lori dadur na’in lima (Manuel Carlos, Lekihonik, Pinto, Raimundo de Oliveira no Armando Soares) ba oho iha fatin ida naran Manlgima, no tiru mate na’in tolu (Graciano Bere Mauk, Martinho no Mau Leki) iha orlalan, no ida seluk (Mali Aru) mate de’it iha fatin ne’e tanba hetan baku makaas husi membru Tonsus, enkuantu na’in rua seluk sira husik fila fali.
