Oekuse – (15 Abril 2024), Centro Nacional Chega! Instituto Publiku (CNC I.P) liu husi Divizaun Relasaun Externa Komunikasaun no Advokasia (DREKA) hala’o atividade diseminasaun relatóriu Comissão de Acolhimento, Verdade e Reconciliação (CAVR)-Chega! no Comissão Verdade e Amizade (CVA)-PMAS (Per Memoriam Ad Spem) no Papel Centro Nacional Chega!I.P ba komunidade sira iha Postu Administrativu Nitibe, Rejiaun Administrativu Espesial Oekuse Ambeno (RAEOA).
Antes hahu atividade diseminasaun, Diretór Divizaun Relasaun Externa Komunikasaun no Advokasia (DREKA), Gaudencio Soares Souza entrega relatróriu Chega! PMAS ba Administradór Postu ho objetivu atu kontibui ba implementasaun relatóriu Chega! no PMAS iha nia knar fatin.
Administradór Postu Administrativu Nitibe, Rejiaun Administrativu Espesial Oekuse Ambeno (RAEOA), Agustinho Afulit hato’o bemvindo ba ekipa CNC I.P mai iha Postu Administrativu Nitibe hodi halo atividade diseminasaun informasaun kona-ba relatóriu Chega! PMAS no papel Centro Chega!I.P.
Nia hatutan, atividade diseminasaun informasaun ne’e importante tebes ba komunidade sira atu bele hatene kona-ba relatóriu Chega! PMAS no papel Centro Chega!I.P nian liu-liu ligadu ba istória pasadu.
Prosesu luta ba ukun rasik-an, komunidade sira liu-liu inan, aman sira mos partisipa balun hetan detensaun no torturasaun, balun hetan violasaun direitus umanus oin-oin maibé to’o agora sira seidauk hetan atensaun husi estadu.
“Atividade ne’e interesante tebes atu akompaña. Ita nia jerasaun sira presiza aprende istória. Hau pesoal hanesan sidadaun timoroan hau hakarak rona istória hodi motiva hau no ita hotu,” dehan Administradór Postu Nitibe, Agustinho Afulit iha abertura atividade diseminasaun ne’ebé hala’o iha Salaun Administrasaun, Segunda (15 Abril 2024).
Iha oportunidade hanesan, Adjuntu Komandante PNTL Postu Nitibe, Calisto S. Sila konsidera atividade diseminasaun ne’e importante tanba bele fahe informasaun ba komunidade sira atu bele hatene istória pasadu tanba to’o agora sira seidauk hatene istória.
“Hau agradese ba Chega! mai to’o iha ita nia fatin, fahe ona informasaun durante ne’e ita seidauk hetan. Ida ne’e oportunidade di’ak tebes, ita bele hetan informasaun kona-ba istória pasadu luta ba independensia”, nia agradese.
Nia mos agradese ba CNC I.P kontinua halo diseminasaun informasaun kona-ba promove paz. Asuntu ida ne’e relevante ba servisu Polisia Nasional Timor-Leste (PNTL) nian. Entaun diseminasaun ne’e bele kontribui ba misaun paz no estabilidade.
Entertantu, atividade diseminasaun informasaun kona-ba relatóriu Chega!, PMAS no papel Centro Chega!I.P ba iha Postu Administrativu Nitibe, Rejiaun Administrativu Espesial Oekuse Ambeno (RAEOA) hola parte iha programa promove rekonsiliasaun no paz iha nível nasionál no internasional ho atividade diseminasaun Chega! no PMAS iha nível Postu Administrativu sira.
(Media CNC)
