Dare – (02 Abríl 2025), Centro Nacional Chega!I.P organiza atividade retiru ba Grupu Traballu Prosesu Rekonsiliasaun Timoroan (GT-PRT) ne’ebé realiza durante loron 2 hahú husi (01- 02 Abríl 2025), iha Centro Retiru Dare, Munisípiu Dili. Atividade retiru ne’e atu aliña hanoin no persepsaun ba asuntu rekonsiliasaun Timoroan.
Iha intervensaun, Prezidente Konsellu Administrasaun Centro Nacional Chega!I.P Manuel M. Pereira hateten, atividade retiru ne’e importante tebes tanba mobiliza hotu-hotu nia persepsaun no hanoin hodi formulariza konseitu ideál liu ba promove rekonsiliasaun.
“Ha’u hanoin liu husi retiru ne’e sai momentu ida ba grupu traballu, formula norma ne’ebé sai hanesan valór ida atu kaer hanesan ita nia narasaun, ita sei kaer hanesan valór ida ba grupu traballu ida ne’e”, dehan Prezidente Konsellu Administrasaun iha retiru Grupu Traballu iha Dare, Munisípiu Dili, Kuarta-feira, (02 Abríl 2025).
Prezidente Konsellu hato’o apresiasaun ba organizasaun rezisténsia, organizasaun sosiedade sivíl no instituisaun estadu no governu ne’ebé mak envolve iha GT-PRT ne’e mak iha vontade tomak fó apoiu ba grupu traballu ida ne’e.
Diretór Ezekutivu Centro Nacional Chega!I.P Hugo Maria Fernandes esplika, objtivu husi atividade retiru ida atu hatur ita nia pensamentu no persepsaun sira kona-ba asuntu rekonsiliasaun Timoroan.
Entertantu, retiru durante loron 2 iha Dare, loron dahuluk, (01 Abríl), aprezentasaun husi oradór mak hanesan, oradór g7+ ne’ebé fahe esperiénsia konflitu no rekonsiliasaun Rwanda nian ba GT-PRT. Loron daruak, (02 Abríl), aprezentasaun husi oradór hanesan, oradór husi Sekretariu Jerál RENETIL Joaquim ‘Russo’ Fonseca ne’ebé ko’alia kona-ba konseitu Rekuperasaun Komunitária. Oradór segundu husi Diretór AJAR Jose Luis Oliveira ko’alia kona-ba konseitu Justisa Tranzitóriu. Oradór terseiru husi Diretór Ezekutivu Centro Nacional Chega!I.P Hugo Maria Fernandes ko’alia kona-ba Prátika Rekonsiliasaun husi CAVR no Centro Nacional Chega!I.P nian.
Rezultadu husi retiru ne’e mak GT-PRT hili Portavoz Grupu Traballu no vogal nain 2. Iha oportunidade ne’e, Grupu Traballu sira mos planeia ba partisipa dialógu ba prosesu rekonsiliasaun ne’ebé sei realiza iha dia 4 Abríl 2025 iha ámbitu komemorasaun masakre Igreja Liquiça 6 Abríl 1999.
Media Centro Chega!.
