Liquiça – (16 Dezembru 2025), Centro Nacional Chega!I.P halo avaliasaun no retiru annual 2025 ho tema “Lideransa, Étika, Integridade no Kultura Servisu”, ne’ebé realiza durante loron 2 (15-16) iha salaun Igreza Liquiça.
Loron dahuluk ho atividade avaliasaun annual objetivu mak atu avalia dezempenu annual hosi programa no atividade sira realizadu hodi atinji objetivu ho forma efetiva nu’udar plataforma ida hodi fo biban ba membru sira, estrutura organika Centro Chega! nian hodi halo avaliasaun hamutuk kona-ba dezempenu servisu, valor no prinsipiu sira Centro Chega! nian no mos atu hadi’a no hametin ispiritu servisu dezenvolvimentu instituisional banati ba mandatu Centro Chega!I.P.
Avaliasaun annual ne’e mos atu hatene atinjimentu indikadór ka objetivu annual hosi divizaun servisu durante tinan 2025 nian no identifika problemas no kauza sira no solusaun alternativas no hametin ekipa servisu ne’ebé forte.
Loron daruak ho atividade retiru annual objetivu atu identifika problema no kauza sira no solusaun alternativas hodi rezolve no hametin ekipa servisu ne’ebé forte nune’e bele kontribui ba dezenvolvimentu institusional
Atividade ne’e partisipa hosi Prezidente Konsellu Administrasaun Administrasaun Centro Nacional Chega!I.P, Manuel Pereira, Membru Konsellu Administrasaun Centro Chega!I.P, Aniceto Guro Berteni Neves no funsionariu Centro Chega!I.P kompostu Divizaun Finansas no Operasional (DFO), Divizaun Politika, Planeamentu no Rekursu Umanu (DIP-PRU), Divizaun Relasaun Externa, Komunikasaun Advokasia (DREKA), Divizaun Servisu Reparativu (DSR), Divizaun Edukasaun no Formasaun (DEF), Divizaun Prezervasaun no Memorializasaun (DPM), Gabinete Apoiu Orgaun Centro Chega! (GAOCC) no mos Donor Coordination and Resource Mobilization (DCRM).
Iha diskursu abertura, Prezidente Konsellu Administrasaun Administrasaun Centro Nacional Chega!I.P, Manuel Pereira hateten, avaliasaun no retiru annual tinan 2025 ne’e hanesan refleksaun ida ba funsionariu sira hotu.
Avaliasaun no retiru annual ne’e mos sai hanesan lalenok ida ba ita hotu atu leno ita idak-idak nia-an kona-ba saida mak ita halo ona no saida mak ita seidauk halo. Buat ne’ebé ita halo di’ak ita kontinua no buat ne’ebé ita halo seidauk di’ak kontinua hadi’a ba oin.
“Hau espera loron 2 nia laran ne’e sai hanesan baze ba refleksaun ida di’ak ba ita hotu-hotu para ita bele hatene durante ita nia prezensa iha instituisaun ne’e ba oin ne’e lamonu de’it ba rai”, dehan Prezidente KA iha abertura atividade avaliasaun no retiru annual ne’ebé realiza iha salaun Igreza Liquiça.
Iha biban ne’e, Diretór Ezekutivu Centro Nacional Chega!I.P, Hugo Maria Fernandes dehan, avaliasaun ne’e sai hanesan sasukat ida ba ita atu bele haree servisu sira ne’ebé halo ho nia dezafius no progresu sira ne’ebé atinji durante tinan 2025 nian.
Tanba ne’e, Diretór Ezekutivu reforsa katak, ho avaliasaun no retiru annual ita hadi’a dezafiu sira, nune’e ita tama tinan oin ho espiritu ho motivasaun no mos iha ona sasukat saida mak ita bele halo para depois ita mellora dezempenu ema nian, divizaun nian, instituisaun nian.
Entertantu, atividade avaliasaun no retiru annual 2025 durante loron 2 iha Munisipiu Liquiça la’o ho di’ak no remata ho atiribuisaun sertifikadu apresiasaun ba Chega! Young Ambassador (CYA), sertifikadu apresiasaun ba Divizaun Sira iha Centro Chega!I.P ne’ebé hatudu prestasaun servisu di’ak no sesaun foto hamutuk.
Media Chega!.
