Dili – (25 Fevereiru 2026), Centro Nacional Chega!I.P liu husi nia Diretór Ezekutivu, Hugo Maria Fernandes asina ona Akordu Servisu Hamutuk (ASH) ho Koordenadór Nasional Asosiasaun Vítima Konflítu Polítiku 1974-1999 (AVKP), Domingos P. de Araujo Moniz. Objetivu husi akordu ne’e mak atu apoiu fundu oprasionál ba Sekretariadu Asosiasaun Vitima.

Diretór Ezekutivu Centro Nacional Chega!I.P, Hugo Maria Fernandes iha serimonia asina ASH ne’e ó enfaze kona-ba apoiu Centro Chega!I.P nian ba Asosiasaun Vitima ho orsamentu hamutuk dólar Amerikanu Rihun Ruanulu resin Lima, Atus Lima Neennulu ($ 25,560.00).

Orsamentu ne’ebé mak Centro Chega! fó atu implementa programa no atividade sira bazeia ba mandatu Chega! nian mak promove implementasaun rekomendasaun sira husi relatóriu Komisaun Akollimentu, Verdade no Rekonsiliasaun (CAVR) no Per Memoriam ad Spem relasiona ho institusionalizasaun memoria no promosaun direitus umanus atraves edukasaun, formasaun, Pesquiza no solidariedade ba sobreviventes vulneravel liu husi violasaun direitu umanu no mos promove rekomendasoens komuns CAVR no PMAS kona-ba konstrusaun sentru nasional memoria, pesquiza no aprendizajen.

“Alokasaun orsamentu bazeia ba proposta aliña ho rekomendasaun Chega!, aliña ho programa prezerva memoria atu fo tulun ba vitima sira”, dehan Diretór iha serimonia asina ASH, ne’ebé hala’o iha Muzeu Chega! Antigo Comarca Balide.

Centro Chega!I.P nu’udar entidade estadu iha obigasaun atu tau matan ba vitima no sobrevivente sira liu husi servisu parseria, tanba ne’e mak Centro Chega!I.P halo parseria ho Asosiasaun Vitima, Klibur Sobrevivente Feto PIRILAMPU no Asosiasaun Eis Prizoneiru Politiku (ASSEPPOL) ne’ebé hala’o servisu ba asuntu vitima no sobrevivente sira.

Tanba ne’e mak Asosiasaun 3 ne’e, idak-idak tenke reflete fila fali se mak vitima no se mak sobrevivente. Atu nune’e iha implementasaun programa no atividade sira la’o ho di’ak. Husi Centro Chega!I.P nia pontu devista katak organizasaun 3 ne’e hotu hotu iha misaun ida oinsa tulun ba vitima no sobrevivente sira maske iha nia operasionalizasaun servisu.

“Hau hein katak asosiasaun sira ne’e labele haree hanesan kompetisaun entre ASSEPPOL, Asosiasaun Vitima ho PIRILAMPU. Ne’e haree de’it katak ida ne’e nu’udar esforsu konjuntu ida oinsa mak ita kobre ema sira ne’ebé mak kuaze ita seidauk kobre”, Hugo fo hanoin.

Iha biban ne’e, Koordenadór Nasional Asosiasaun Vítima Konflítu Polítiku 1974-1999 (AVKP), Domingos P. de Araujo Moniz hato’o agradesimentu ba Centro Chega!I.P ne’ebé nafatin fo konfiansa ba Asosiasaun Vitima hodi kontinua hala’o servisu hamutuk.

“Ami nia agradesimentu ba konfiansa, ba tinan 7 Centro Nacional Chega!I.P fo fiar ba Asosiasaun Vitima para ita bele la’o hamutuk hodi haforsa hanesan parseria, oinsa mak ita bele rezolve situasaun vitima funu nian”, Koordenadór agradese.

Entertantu, kooperasaun servisu entre Centro Chega!I.P ho Asosiasaun Vitima la’o durante tinan 7 ona no implementa ona programa lubuk ida mak hanesan, programa Uma Memória ba Esperansa (UmbE) ba sobrevivente mais vulneravel, programa apoiu umanitáriu ba sobrevivente mais vulneravel, programa apoiu pontual, programa apoiu konsulta saúde ba sobrevivente, programa apoiu bolsu estudu ba sobrevivente mais vulneravel nia oan, programa formasaun ba pontu fokál asosiasaun vitima, programa apoiu fortalesimentu sekretáriadu AVKP 1974-1999 no programa sosa produtu lokál sobrevivente no seluk tan.

Media Chega!.