Centro Nacional Chega!I.P liu husi Divizaun Edukasaun no Formasaun (DEF) hamutuk ho Asosiasaun Vítima Timor-Leste organiza atividade formasaun kona-ba “TOUR GUIDE” ba direjente Asosiasaun Vítima husi munisípiu 12 inklui RAEOA iha loron 25 Jullu 2020, iha Salaun Konferénsia Centro Chega! Antigo Comarca Balide – Dili.
Objetivu husi aktividade formasaun mak atu envolve Asosiasaun Vítima iha programa Centro Chega! nian liuliu ba programa memorializasaun no parte seluk aumenta koñesimentu dirijente Asosiasaun Vitima sira nia oinsá sai Tour Guide ida di’ak ba turista lokál, nasionál no internasionál inklui ba estudante no juventude sira ne’ebé hakarak vizita sítiu istóriku iha sira nia munisipiu ida-idak.
Iha sesaun abertura, Diretór Ezekutivu Centro Chega! Hugo Maria Fernandes hato’o apresiasaun boot ba vontade Asosiasaun Vitima ne’ebe kontinua kolabora ho Centro Chega! iha programa memorializasaun inklui komemorasaun ba loron istóiku sira, ne’ebé kada tinan hala’o iha teritóriu Timor-Leste tomak.
“Asosiasaun Vitima sira presiza mós identifika fatin sira ne’ebé konsidera hanesan fatin istóriku atu kontinua prezerva tanba iha valór istória rasik no iha mós valór edukasaun ba jerasaun foun sira tuir mai,” Hugo afirma.
Hugo esplika, fatin ne’ebé konsidera hanesan fatin istóriku mak hanesan fatin masakre ka oho ema barak iha fatin ida no tempu ne’ebe hanesan, fatin konsentrasaun ka fatin halo demostrasaun, fatin kastigu ka komarka, no fatin abrigu ka fatin segredu ne’ebe lider rezisténsia sira uza iha tempu rezistensia.
