Centro Nacional Chega!I.P (Centro Chega!) liu hosi Divizaun Solidariedade no Sobrevivente (DSS) organiza Seremonia Assina Nota Entendimentu entre Centro Chega! ho Assosiasaun Eis Prizineiru Politiku (ASSEPOL) iha loron Quinta-feira (19/03/2020), hala’o iha Salaun Konferensia Centro Chega!, Antigo Kormarka Balide, Dili.
Iha okaziaun ida ne’e, Presidente Konsellu Administrasaun Centro Chega! (em Exercicio) Rev. Arlindo Francisco Marçal, iha ninia breves palavra hatete katak objetivu husi Nota Entendimentu ne’e rasik atu parte rua apoiu malu hodi implementa atividade sira ne’ebe hatur ona iha rekomendasaun Chega! hosi Komisaun Amizade, Verdade no Rekonsiliasaun (CAVR, sigla Portugues) no relatoriu husi Komisaun Verdade no Amizade (CVA, sigla Portugues), liu-liu ba apoiu sobreviventes. Kooperasaun ne’e rasik iha ambitu fortalesimentu instituisional no dezenvolvimentu politika.
Alem de ida ne’e Presidente Interinu Centro Chega! realsa liu tan katak ambitu kooperasaun ida ne’e hodi introduz mos “Programa Politika Hakbiit Sobrevivente Vulneravel Sira”, hodi nune’e bele asegura identifikasaun lolos ba sobreviventes vulneravel liu, ne’ebé servisu ne’e rasik hahu ona iha tinan kotuk, koopera hamutuk ho parseru sira seluk.
Iha fatin hanesan Presidente Assosiasaun Eis Prizeneiru Politiku (ASSEPOL) Jacinto das Neves Raimundo Alves hateten katak loron ida ohin, ba ambitu assina Memorandum ida ne’e ASSEPOL sente haksolok tebes atu bele servisu hamutuk ho Centro Nacional Chega! Nune’e mós, kooperasaun ne’ebe ASSEPOL atu hala’o ho Centro Chega! ne’e ami sente importante no prioridade duni ba ASSEPOL. Espera katak iha tempu badak nia laran ita bele hahu ezekuta ona.
Iha parte seluk Diretor Executivo Centro Chega! Hugo Maria Fernandes esklarese liu tan konteudu husi nota entendimentu katak iha pontus boot rua ne’ebe nia objetivu mais ampla (luan liu): (1) Parseria atu fahe kbi’it ba malu entre Centro Chega! ho ASSEPOL; no (2) Kontinua apoiu ba sobrevivente sira. Tanba ne’e, fulan oin (Abril) hein katak apoiu finanseiru dahuluk ba tinan ida ne’e husi Centro Chega! ba ASSEPOL, para depois hahu funsionaliza sekretariadu numínimu hanesan Assosiasaun Vitima sira, no lor-loron bele hahu halo ona servisus.
Nune’e mos Diretor Executivo argumenta liu tan katak sekretaridau no fasilidades ba ASSEPOL ne’e sei fornese husi Centro Chega! rasik hanesan eletrisidade, internet, salaun ba enkotru no bibileoteka, para bele hahu ona servisu sira planu anual no programa sira, inklui bele hahu ona elebora plano annual no programa estrategiku tuir mai.
Hugo fortifika tan katak programa sira ne’e sei hala’o anualmente hodi hare priodade sira ne’ebe mak ASSEPOL iha, hodi Centro Chega! bele apoiu. Por ezemplu bele peskiza konjutura parte rua nian tanba Centro Chega! iha Divizaun Peskiza no Arquivu Istoriku, nomos Divizaun Solidariedade ba Sobreviventes.
Programa ne’e sei hetan tulun ho orsamentu hosi Ministeiru Solidariedade Sosial no Inkluzaun neébe preve ona ba progama apoiu sobrevivente sira ne’ebe vulnerável liu, dehan Hugo.
Serimonia Nota Entendimentu refere partisipa hosi parseiru estratejiku Centro Nacional Chega!, mak hanesan Ministeriu Justisa, Providoria Direitus Umanus, AJAR, ACBIT, inklui Deputadu Parlamentu Nasional.* (Luis Garcia dos Santos, Voluntariu iha DSS, Centro Chega! | 20.03.2020).
