Dili – Centro Nacional Chega!I.P asina ona Akordu Servisu Hamutuk (ASH) ho Asosiasaun Eis Prizoneiru Polítiku (ASEPPOL) no Asosiasaun Vítima Konflitu Polítiku 1974-1999 hodi apoiu osan hamutuk USD 88,900.00 (Dolar Amerikanu Rihun Ualunulu Resin Ualu, Atus Sia) ba apoiu operasionalizasaun no atividade asosiasaun nian.
Diretór Ezekutivu Centro Chega!, Hugo Maria Fernandes informa, objetivu husi asina ASH ne’e, atu apoiu osan ba asosiasaun rua mak hanesan; -Ida apoiu ASEPPOL totál USD 42,100.00 (Dollar Amerikanu rihun haat nulu resin rua, atus ida) no Asosiasaun Vítima Konflitu Polítikuu 1974-1999 totál USD 46,800.00 (Dolar amerikanu rihun haat nulu resin neen atus ualu).
“Akordu tinan ida ne’e nu’udar kontinuasaun ba akordu ne’ebé la’o tiha ona iha tinan hirak liu ba. Iha tinan ida ne’e Centro Chega! kontinua hatudu nia komprimisu atu kontinua apoiu operasionalizasaun ba organizasaun rua ne’e”, dehan Hugo liu husi konferensia imprensa ne’ebé hala’o iha Salaun Enkontru Centro Chega! Antigu Coamarca Balide, Dili, Segunda-feira (28/02/2022).
Hugo informa, Centro Chega! kontinua fó apoiu ba asosiasaun rua ne’e, oinsá mak sira bele kotinua hala’o sira nia servisu Serkretariadu nian nomos apoiu halo atividade sira ne’ebé iha terenu.
Akordu ne’e hala’o tanba bazeia ba proposta ne’ebé mak ASEPPOL no Asosiasaun Vítima Konflitu Polítiku 1974-1999 hatama ba Centro Chega! iha tinan 2022. Centro Chega! atribui apoiu ne’e liu husi Orsamentu Jeral Estadu (OJE) nian no orsamentu ne’e tama iha transferensia públika.
Koordenadór Asosiasaun Vítima Konflitu Polítiku 1974-1999, Domingos P. de Araujo Moniz agradese Centro Chega! ba Asosiasaun Vítima Konflitu Polítiku 1974-1999 liu husi hatama proposta ba Centro Chega!.
Tanba tinan ida ne’e Asosiasaun Vítima Konflitu Polítiku 1974-1999 sei rekruta ema na’in tolu mak hanesan, Manajer Programa, Asisten Administrasaun no finansas no Asisten Inkluzaun.
“Agradese wain tebes tanba instituisaun ida hetan apoiu hanesan ne’e, funsionamentu Sekretriadu nasional no osan ne’e hanesan ran ba movimentu sekretariadu nian”, dehan agradese.
Enkuantu Diretór Ezekutivu ASEPPOL, Martinho R. Pereira mos agardese ba Centro Chega! ba apoiu ASEPPOL iha tinan ida ne’e tanba iha tinan ne’e ASEPPOL mos sei halo rekrutamentu ba funsonáriu ida tan oinsá mak hala’o servisu iha Relasaun Externa.
Osan ne’ebé Centro Chega! fó ba ASEPPOL parte ida mos atu apoiu ba área kapasitasaun no mos atividade realizasaun aselmbleia jeral iha tinan ida ne’e, atu atu nune’e buat hotu la’o tuir regra.
Enkuantu, selebrasaun ASH akompaña husi Fiskal Uniku, Diretór no Xefe Departementu sira iha Centro Chega!.
Media Chega!
