Dili, iha loron 02 Agustu 2021, Centro Nacional Chega!I.P liu husi Diretór Divizaun Relasaun Esterna Komunikasaun no Advokasia (DREKA) Gaudencio Soares Souza no Diretór Divizaun Edukasaun no Formasaun (DEF) Vicente Borges Maia halo enkontru ho Diretora Promosaun Provedoria dos Direitus Humanus no Justiça (PDHJ) Marinha Gaio iha Sala Enkontru Diretoria iha Caicoli-Dili.
Enkontru ne’e realiza ho intesaun ajusta implementasaun Rekomendasaun Chega! no Per Memoriam Ad Spem iha Planu Anual PDHJ nian iha tinan 2022 bazeia ba Nota Entedimentu (MoU) ne’ebé asina ona entre parte rua iha tinan hirak liu ba.
Diretór Divizaun Edukasaun no Formasaun (DEF) Vicente Borges Maia esplika, ekipa Centro Chega! hasoru malu ho PDHJ atu halo ajustamentu ba planu 2022 no integra materia Chega! kona-ba introdusaun istória moruk (aat) pasadu nian ne’ebé komete husi Polisia ka Militar TNI Indonézia ho funsionáriu sira halo ba Timoroan hodi larepete tan akontesimentu hanesan iha Timor.
Nia haktuir, importante liu mak oinsá bele integra materia Chega! no Per Memoriam Ad Spem ne’e ba iha materia formasaun mak durante ne’e PDHJ fornese. Centro Chega! ninia materia ne’e atu esplika de’it kona-ba, saida mak Centro Chega! halo, tanbasa mak Centro Chega! eziste.
Diretór Divizaun Relasaun Esterna Komunikasaun no Advokasia (DREKA) Gaudencio Soares Souza reforsa, Centro Chega! nia prezensa hodi halo enkontru ho PDHJ tanba atu halo ajustamentu ba planu 2022, tanba oras ne’e dadaun Centro Chega! prepara hela planu orsamentu.
Entretantu, Diretora Promosaun Provedoria dos Direitus Humanus no Justiça (PDHJ) Marinha Gaio esplika, servisu kooperasaun entre Centro Chega! no PDHJ la’os foin hahu maibé kooperasaun ne’e kleur tiha ona.
PDHJ ninia prinsipiu kooperasaun ho Centro Chega! objetivu mak atu haree oinsa atu promove no proteje direitus umanus iha nasaun Timor-Leste liu husi formasaun sira ba funsionáriu publiku, PNTL no F-FDTL sira atu garante direitus umanus no boa governasaun.
“Ami nia planu formasaun ba PNTL iha tinan 2022 ne’e ba dala-3, ba F-FDTL ne’e ba dala 2, enkuantu planu formasaun ba Funsionáriu publiku sira ne’e foka ba iha liña ministeriál sira ne’ebé iha munisipiu no postu administrativu. Atividade seluk ne’ebé Centro Chega! no PDHJ bele la’o hamutuk tan iha diseminasaun informasaun ba estudante no komunidade sira”, nia afirma.
