Díli – (25 Abríl 2024), Vise Ministru Asuntu Parlamentar (VMAP), Aderito Hugo da Costa husu Centro Nacional Chega! Instituto Publiku (CNC I.P) atu kontinua halo diseminasaun informasaun kona-ba Relatóriu CAVR (Comissão de Acolhimento, Verdade e Reconciliação) – (Chega!), Relatóriu CVA (Comissão de Verdade e Amizade) – Per Memoriam Ad Spem (PMAS) no Papel Centro Nacional Chega!I.P ba públiku atu bele hatene.
Centro Chega!I.P nu’udar instituisaun ida iha papel importante atu halo prezervasaun ba istória pasadu kona-ba sofrementu povu Timor-Leste nian iha prosesu luta ba ukun rasik-an. Alende prezervasaun, nia mos halo protesaun ba sitíu istoriku sira iha teritóriu Timor laran tomak nu’udar faktu istóriku.
Nia afirma, Centro Chega!I.P kontinua halo diseminasaun informasaun kona-ba istória pasadu ba públiku atu sira bele iha interese aprende istória Timor-Leste nian iha prosesu luta ba ukun rasik-an hodi hametin espiritu nasionalizmu no patriotizmu.
Kestaun ne’e, Vise Ministru Asuntu Parlamentar (VMAP), Aderito Hugo da Costa hato’o iha abertura konferénsia nasionál ho tema “Tinan 50 Momentu Istóriku 25 Abríl Refleksaun kona-ba Deskolonizasaun iha Timor-Leste 1974-1975”. Konfrensia ne’e realiza iha ámbitu komemorasaun 25 Abríl Revolução dos Cravos, ne’ebé realiza iha Salaun Konferénsia Centro Chega!, Antigo Comarca Balide-Dili.
Ni argumenta “Ohin loron Timor-Leste tama iha faze dezenvolvimentu, ema hotu presiza hatene istória pasadu, atu nune’e, bele servi povu no rai ida ne’e ho dignu, maske ita iha liberdade no demokrasia nia laran, maibé labele haluha ninia istória pasadu”.
“Dala ida tan ami nia apresiasaun aas, atu kontinua lori ba oin Instituisaun Chega!. Atu kontinua prezerva istória fundamental sira iha ita nia rai, ita nia povu nia sofrementu,” dehan Vise-Ministru iha diskursu abertura konferensia nasional.
Vise Ministru subliña katak, Centro Chega! “kontinua disemina ba ita nia povu i mos projeta ba ita nia futuru ida ne’ebé nabilan atu servi ita nia rai, ita nia povu ho dignu iha kanal ida liberdade demokrasia, iha kanal ida estadu direitu demokratiku”.
Istória nu’udar aliserse ba dezenvolvimentu nasional. Nune’e, liu husi konferensia nasional ida ne’e atu hatudu dalan ida ba ita katak los duni (serteza), ita iha dalan ne’ebé loos hanesan estadu direitu demokratiku.
Entertantu, Centro Nacional Chega!I.P estabelese ho dekretu Lei no. 48/2016. Centro Chega! nia vizaun mak: “Sosiedade ida ne’ebé inkluzivu, la repete istória pasadu nian, moris iha dame, no respeitu ba direitus umanu”. Centro Chega! nia misaun mak: “Harii sentru Pós-konflitu ne’ebé prezerva memória pasadu nian hodi promove direitus no valór umanu, harii parseria nasionál no internasionál hodi reforsa rede servisu sira atu implementa rekomendasaun sira husi Relatóriu Final Comissão de Acolhimento, Verdade e Reconciliação (CAVR)-Chega! No Comissão da Verdade e Amizade (CVA) – Per Memoriam Ad Spem, sira ne’ebé relevante”.
(Media CNC)
