Dili – (29 Jullu 2026), Estudante Estajiariu Internasional na’in 2 husi Universitas Katolik Widya Mandira (UNWIRA)-Kupang hanesan, Katarina Siena, Programa Estudu Administrasaun Publika, no Yohanes A. D. Eno, Programa Estudu Siénsia Komunikasaun, Fakuldade Siénsia Sosial no Siénsia Polítika termina ona sira nia estajiu internasional iha Centro Nacional Chega!I.P, durante fulan 2.

Estudante Estajiariu Internasional, Yohanes A. D. Eno no Katarina Siena hato’o agradesimentu ba Centro Chega!I.P tanba fasilita no guia sira durante estajiu fulan 2 no aprende kona-ba lala’ok servisu instituisaun governu hanesan Chega! ne’ebé halo servisu ba implementasaun rekomendasaun sira husi relatóriu Chega! ba asuntu direitus umanus, prezervasaun memória, rekonsiliasaun no seluk tan. Afirma tan katak, ho espensia ne’ebé hetan hanesan bukae ba sira iha futuru. Sira mos kompromete, sei hatutan lisaun di’ak sira iha Chega! ba kolega no públiku tantu iha Kupang no iha fatin seluk.

Dosente Programa Siénsia Komunikasaun, Innosensia E. I. Ndiki Satu, S. Sos., M.I,Kom hato’o agradesimentu ba Chega! ne’ebé fasilita no guia estudante sira durante fulan 2. Dosente ne’e argumenta katak, estajiariu na’in 2 ne’ebé termina iha Chega! hatudu susesu. Tan ne’e, UNWIRA-Kupang kontinua afirma komitmentu no vontade no tinan oin sei kontinua koloka estudante sira iha Chega!. Dosente rekoñese katak, estudante UNWIRA-Kupang hala’o estajiu iha Chega! hatudu UNWIRA nia progresu, susesu no naran di’ak iha Indonézia.

“Sangat membantu kami dengan program ini, bahwa anak-anak pengalaman yang berbedah bagimana dunia kerja secara global. Ini menjadi satu wawasan bagi mereka, bahwa mereka melihat kerja secara global itu seperti apa”, dehan Innosensia.

Diretór Ezekutivu Centro Nacional Chega!I.P, Hugo Maria Fernandes hato’o parabens ba estudante estajiariu ne’ebé termina ona estajiu iha Chega! no mos gradese ba UNWIRA-Kupang ne’ebé fo konfiansa. Diretór husu ba estudante sira atu fahe esperensia ne’ebé hetan iha Chega! ba kolega no iha fatin servisu karik hetan servisu ruma iha futuru. Esperensia ne’ebé hetan nu’udar valór importante iha mundu akademiku no mos mundu servisu nian.

Entertantu, ikus husi atividade ne’e, UNWIRA-Kupang reprezenta husi Dosente Programa Siénsia Komunikasaun tara tais, entrega sertifikadu no plakat akrilik Universidade nian ba Diretór Ezekutivu ho ekipa nu’udar simbolu apresiasaun akademika ba kooperasaun di’ak. Centro Chega! mos tara tais nu’udar simbolu apresiasaun no agradesimentu ba estudante estajiariu, dosente no universidade.

Media Chega!.