(Díli, 14 Maiu 2026) – Centro Nacional Chega!.I.P liu husi programa Chega! Young Ambassador (CYA) servisu hamutuk ho Faculdade Economia e Gestão (FEG) – Universidade Nasional Timor Lorosa’e (UNTL) organiza atividade Chega! School Visit ho tema “Juventude Tenke Hatene no Valoriza Istória Pasadu Hodi Kontinua Luta ba Libertasaun Povu”. Atividade ne’e hala’o iha ámbitu Selebrasaun Aniversáriu loron Restaurasaun Independénsia Timor-Leste 20 de Maio 2002 ba dala-24, ne’ebé realiza iha Auditoriu FEG – UNTL.
Objetivu husi atividade ne’e mak atu halibur estudante universitariu sira hodi diskuti hamutuk kona-ba istória, Memoria Pasadu no Mekanismu ba Prevensaun Konflitu no Rezolusaun Dame iha Timor-Leste. Objetivu seluk mak nu’udar oportunidade di’ak no fo espasu ba estudante no juventude sira atu melloria sira nian koñesimentu kona-ba istória pasadu Timor-Leste nian no preserva ba futuru ne’ebe mai.
Atividade ne’e hala’o parte ida atu konsientiza, eduka no inspira estudante sira liu-husi atividade Chega! School Visit hodi sira komprende kona-ba istória, Memória Pasadu no Mekanismu ba Prevensaun Konflitu no Rezolusaun Dame iha Timor-Leste no mos dezenvolve sira nia pensamentu kritiku hodi hamosu dialógu interativu ho estudantes sira atu nune’e bele kontribuí ba prevensaun konflitu no rezolusaun dame hodi minimiza aktu violasaun no respeita, sensibilidade no valóriza valór direitus umanus iha estadu ida ne’e no mós mundial.
Atividade ne’e hala’o hodi hatan ba Nota Konseitu “Memórializasaun integradu” liu-liu atu prezerva memória istóriku liu husi peskiza, arkiva no dizemina narativa sira ba públiku tantu direita no mos indireita.
Rezultadu espetativa husi atividade ne’e mak hanesan, Juventude no estudantes universitariu sira hatene ona sa mak CNC!I.P halo perante nia ezistensia no komprende ona istória pasadu kona-ba prosesu luta libertasaun independensia Timor-Leste husi tinan 1974-1999. Foinsa’e bele konsiente no komprende ona tipu no aktus violasaun direitu umanus ne’ebe mak akontese iha tempu ne’eba kruel nu’udar aksaun ida ne’ebé mak ladiak. Foinsa’e sira bele sensivel ba iha terus no susar luta nain sira-nian hodi respeita norma no oinsá atu valóriza direitus umanus hodi kotribui ba paz no estabilidade iha Timor-Leste.
Entertantu, atividade hirak ne’e hala’o hodi hatan ba mandatu Centro Nacional Chega! I.P nian ho baze ba dekretu lei Nu. 48/2016 ho vizaun atu harii Sosiedade ida ne’ebé mak inkluzivu, la repete istória passadu nian, moris iha dame, no respeitu direitus umanus. Centro Chega! ninia misaun mak atu harii Centru ba Poz-konflitu ne’ebé prezerva memória pasadu hodi promove direitu no valór umanu no harii parseria nasionál no mos internasionál hodi reforsa servisu sira ba implementa rekomendasaun sira Relatóriu Finál “Comissao de Acolhimento, Verdade e Reconciliacao (CAVR)- Chega! Comissao da Verdade e Amizade (CVA)- Per Memóriam Ad Spem, sira ne’ebé relevante.
Detallu informasaun bele download PDF:KomImp. Chega! School Visit
