Dili – (03 Fevereiru 2026), Estrutura organika ho funsionáriu tomak Centro Nacional Chega!I.P simu ho mate-been mate isin Eng. Augusto Napoleão Fernandes, nu’udar Ofisiál Servisu Memorializasaun Centro Chega! no fo omenajen ikus ba mate isin iha Resintu Edifisiu Arkivu Centro Chega! iha 03 Fevereiru 2026, Antigo Comarca Balide – Dili.

Vizita mai Centro Chega! ne’e hanesan vizita no despedida ikus ho Funsionáriu tomak, hafoin matebian husik iis iha HNGV Dili, iha loron Domingo, 01 Fevereiru 2026.

Iha serimonia despedida ikus, Diretór Ezekutivu Centro Nacional Chega!I.P Hugo Maria Fernandes relembra fali kona-ba múzika ho títlu “Brothers in Arms” ne’ebé tradúz ba Tetun “Maun Alin Kahe Kabas ba Malu”, ne’ebé refleta oinsá mak matebian mai hamutuk fatin ida ne’e, iha maun alin oin-oin, mai husi fatin oin-oin, maibé funu ne’e halo hamutuk hodi kahe kabas ba malu.

Tuir Diretór Ezekutivu, Ema hotu-hotu dehan funu ne’e hotu ona, maibe ba Ema sira ne’ebé servisu iha Centro Chega! funu seidauk hotu, no Matebian Napo mos luta hela ho obra sira ne’ebé nia halo iha Centro Chega!.

Nia hatutan, Matebian Napo nia liafuan no refleksaun “Aprende husi Pasadu hodi Hametin Identidade”, mak halo ami hamutuk iha Centro Chega!, hamutuk nu’udar maun alin tanba ho misaun ida ho vizaun ida oinsa atu harii Timoroan nia identidade.

Diretór kompromete katak, edifisiu foun Arkivu Centro Nacional Chega!I.P nian, iha aula ida sei tau matebian nia naran hodi dedika ba nia esforsu servisu ba obra ne’e husi inisiu to’o remata no obra ne’e seidauk inagura nia fila ona ba aman Maromak nia kadunan Santo.

Hafoin fo tiha omenajen ba Matebian Eng. Augusto Napoleão Fernandes, Diretór Ezekutivu ho Kolega Funsionáriu Centro Chega! sira mos akompaña mate isin hodi ba to’o iha Matebian nia rai moris fatin iha Aldeia Titilari, Suku Fuiloro, Postu Administrativu Lospalos, Munisípiu Lautem.

Media Chega!.