Ainaro, (24 Outobru 2025) – Reprezentante Vise Ministru Asuntu Parlamentar (VMAP), Centro Nacional Chega!I.P hamutuk ho Prezidente Autoridade Munisipiu Ainaro no Asosiasaun Vitima Konflitu Politiku 1974-1999 (AVKP) inagura Uma Memória ba Esperansa (UMbE) ba Sobrevivente no Vitima, Ana G. de Lima S. Lemos Almeida, iha Aldeia Guer-udu, Suku Soro, Postu Administrativu Ainaro, Munisipiu Ainaro.
Reprezentante Vise Ministru Asuntu Parlamentar (VMAP) no mos Centro Nacional Chega!I.P, Inocencio de Jesus Xavier destaka pontus prinsipal kona-ba atensaun estadu no governu nian ba sobrevivente no vitima funu nian hahú hosi 1974-1999 no implementasaun rekomendasaun sira hosi relatóriu Chega! no PMAS liu-liu halo reparasaun ba sobrevivente no vitima sira tanba kauza hosi konflitu pasadu. Nia mos subliña, apoiu ne’ebé governu liu hosi Centro Chga!I.P fo la’os atu selu sira nia sofrementu maibé nu’udar rekoñesimentu, valorizasaun no dignifikasaun ba sira.
Inocencio mos impresta liafuan murak hosi sobrevivente sira nian ne’ebé hateten katak, “los duni ami lakaer kilat maibé, ami nia isin sai abrigu ba asuwain sira, ami lakaer kilat latiru malu maibé ami nia isin sai abrigu ba asuwain FALINTIL sira no joven rezistensia sira. Ne’e hatudu katak wainhira ita halo funu ita evakua ba foho leten, sira iha vila laran sira hetan tratamentu oin-oin, tratamentu dezumanu, desgrasas, iha violasaun barbarak ne’ebé sira hasoru ho sira nia isin tomak. Balun mate iha prizaun, balun hetan oan iha prizaun nia laran durante detensaun iha komplekasidde barak ne’ebé mak rejista hela”.
Prezidente Autoridade Munisipiu Ainaro, Manuela Georgina Carmo Bucar Corte Real hato’o apresiasaun ba servisu Centro Chega!I.P tanba halo ona Uma Memoria ba Esperansa (UMbE) ba sobrevivente no vitima Ana ne’ebé iha istória pasadu nakukun no ohin loron kontinua moris ho kondisaun uma ne’ebé ladi’ak, nia merese duni hetan uma sai hanesan mahon ida ba nia ho familia sira.
Koodenadór Nasional Asosiasaun Vitima Konflitu Politiku 1974-1999 (AVKP), Domingos P. de Araujo Moniz reforsa katak, sobrevivente ne’e merese duni hodi hetan Uma Memoria ba Esperansa (UmbE). Uma ne’e ho medida 9×7, kompostu husi, Kuartu 3, sala 1, haris fatin 1, varanda 1 no mos dapur, kompleta ho instalasaun eletrisidade, plafon no keramik, exeptu dapur ho totál kustu $ 14.532.00 inklui ona selu badae.
Sobrevivente Ana G. de Lima S. Lemos Almeida hanesan benefisiariu Uma Memoria ba Esperansa (UMbE) hato’o sentimentu kontente no agradese wain ba Centro Chega!I.P tanba bele halo ona uma ba nia. Durante ne’e hela iha uma ne’ebé ladi’ak tanba uma ne’e taka ho kalen feruzin, iha tempu udan susar ba nia deskansa tanba udan been tama uma laran kuartu sira nakfilak sai bee lihun.
Nia esplika, iha tempu pasadu nia sai nu’udar estafeta ba FALINTIL sira. Nia mos hetan detensaun durante tinan 2 fulan 10 no mos hetan violasaun direitus umanus oin-oin hosi Militar Indonézia. Alende nia hetan violasaun, nia familia liu-liu nia aman mos Militar Indonézia tiru mate no ko’a sai tiha nia nia ulun. Asaun kruel ne’ebé mak Militar Indonézia halo tanba defende ukun rasik-an.
Media Chega!.
