Dili – (08 Abril 2025), Grupu Traballu Prosesu Rekonsiliasaun Timoroan (GT-PRT) hamutuk ho Centro Nacional Chega!I.P aprezenta Nota Konseitu (NK) nu’udar vizaun jeral kona-ba rekonsiliasaun nian ba Primeiru Ministru (PM), Kay Rala Xanana Gusmão nu’udar Xefe Governu IX Governu konstitusional nian, iha  Antigo Comarca Balide.

Kestaun ne’e, Portavoz GT-PRT, Joaquim Russo Fonseca hato’o liu husi konferensia imprensa ba media nasional sira, iha Salaun Konferensia Centro Chega!I.P Antigo Comarca Balide, hafoin remata dialogu entre GT-PRT ho Primeiru Ministru (PM).

Portavoz GT-PRT haktuir, dialogu hanesan oportunidade di’ak tanba Grupu GT-PRT hamutuk ho Centro Chega!I.P aprezenta ba Xefe Governu kona-ba prosesu preparatoriu ne’ebé mak Grupu Traballu ne’e halo ona hodi prepara ba prosesu rekonsiliasaun nian.

“Ohin ne’e iha dokumentus rua aprezenta mak, Nota Konseitu kona-ba rekonsiliasaun timoroan. Ida ne’e hanesan vizaun jeral kona-ba rekonsiliasaun. Ne’e katak ita ko’alia rekonsiliasaun ne’e ita ko’alia saida?. Depois dokumentus seluk mak termu referensia ba Prosesu Rekonsiliasaun. Ida ne’e ko’alia kona-ba pasu tekniku ne’ebé mak tenke foti prosesu ida. Ne’e atu bele fo fatin ba ema timoroan sira atu bele fo dame ba malu”, Portavoz GT-PRT esplika.

Jornalista sira husu, bainhira mak rekonsilasaun hahu, Portavoz GT-PRT esplika, agora dadauk ne’e sei iha prosesu preparatoriu maibé ko’alia kona-ba hahu rekonsiliasaun ne’e, tuir nia, rekonsiliasaun ne’e hahu tiha ona ka akontese tiha ona iha pasadu. Uluk CAVR nia tempu halo tiha ona rekonsiliasaun mak hanaran rekonsiliasaun komunitaria. Entaun agora ne’e ita atu kontinua de’it prosesu ne’ebé mak akontese ona.

“Atu operasionaliza prosesu ida ne’e sei iha fulan ida ka rua hanesan ne’e tanba tenke defini didi’ak termu referensia, estabelese prosedimentu operasional, depois sei identifika ema, preparasaun ba ema sira ne’ebé tenke involve hodi fasilita iha komunidade nia leet”, nia informa.

Husu kona-ba PM nia orientasaun ba GT-PRT, Joaquim hateten, PM la’os fo orientasaun, maibé nia apresia dokumentus ne’e. Apresiasaun ne’e la’os gaba de’it, maibé nia fo ninia hanoin ka pontu devista kona-ba dokumentus ida ne’e. Dokumentus ne’ebé mak grupu traballu prepara ne’e, PM husu atu kompleta buat balun ne’ebé seidauk inklui iha dokumentu ne’e nia laran, maibé jeralmente PM haree katak dokumentus ne’e pozitivu.

PM apresia pontu pozitivu, PM mos agradese ba esforsu ne’ebé Grupu Traballu halo ona, PM mos kompromete sei apoiu pesoal no mos apoiu governu nian ba prosesu rekonsiliasaun ida ne’e.

Media Centro Chega!.