Ermera – Centro Nacional Chega!I.P, realiza atividade retiru anuál 2022, ne’ebé hala’o iha Salaun Sentru Formasaun Extensaun Agrikultura Pe. Domingos Sequeira, CCT-NCBA, Postu Administrativu Railaco, Municípiu Ermera, atu konkretiza planu Centro Chega!I.P iha tinan 2023.
Retiru anuál ne’e hala’o durante loron tolu hahú (09-11 Janeiru 2023) ho tema “Esforsu ba halo Di’ak, Lori Benefisiu Apropriadu”. Objetivu hosi retiru anuál ne’e mak elebora planu operasional, planu ezekusaun no aprovizionamentu 2023 nian no taka ho atividade kalan refleksaun.
Retiru anuál partisipa hosi Konsellu Administrasaun, Diretór Ezekutivu, Fiskal Uniku, Diretór/a Divizaun sira, Xefe Departementu no Ofisial sira hamutuk ema na’in 60.
Membru Konsellu Administrasaun Centro Chega!, Sisto dos Santos esplika, retiru anuál 2022 atu hametin servisu hodi konkretiza planu Centro Chega! iha tinan 2023, atu responde ba preokupasaun sobrevivente sira nian.
Retiru anuál ne’e, atu hatur espasu hodi hametin liu-tán esforsu, atu Centro Chega! bele kontribui, hatan ba espetativa sobrevivente nian. Tinan kotuk, Centro Chega! halo ona esforsu lubuk boot ida fó rezultadu ne’ebé di’ak. Iha tinan 2023, ita esforsu nafatin hodi implementa planu no programa ne’ebé iha.
Tanba planu di’ak sira ne’ebé iha, nia argumenta, ita seidauk konsege ezekuta. Ita nia espetativa ba tinan ida ne’e, ita bele konkretiza planu sira. Nune’e, ita nia planu tinan 2023, ita bele hatun liu hosi asaun konkretu ida hodi hadi’ak liu-tán ita nia servisu.
Fatór importante atu hametin liu-tán servisu mak divizaun sira hanesan, Divizaun Relasaun Externa Komunikasaun no Advokasia (DREKA), Divizaun Edukasaun no Formasaun (DEF), Divizaun Peskiza no Arkivu Istóriku (DPAI), Divizaun Dezenvolvimentu Institusional no Rekursu Umanu (DDIRU), Divizaun Finansas no Operasional (DFO) no Gabinete Apoiu Orgaun Centro Chega! (GAOCC) tenke halo kordenasaun servisu ne’ebé di’ak atu bele optimaliza liu-tán servisu iha tinan 2023.
Maske tinan ida ne’e, ita hasoru ámbitu ba eleisaun jerál, maibé ida ne’e la implika ba atividade Centro Chega!I.P tanba ita nia planu no programa sira planeadu no programadu ona.
Ita nian espetativa tinan 2023 mak sobrevivente sira bele hetan tán Uma Memoria ba Esperança (UME), sobrevivente nia oan sira bele hetan tán bolsu estudu no seluk tan. Ida ne’e mak ita nia alvu prinsipál lolos ba iha tinan 2023.
“Ita hein katak ba retiru anuál ida ne’e ita optimaliza ita nia enerjia, ita nia konsentrasaun, ita nia foku hodi hakonu espetativa ba ita nia benefisiuariu sira liuliu ba sobrevivente sira,” dehan Sisto ba Media Chega!, hafoin remata abertura atividade retiru anuál foin lalais ne’e.
Ita hein, divizaun sira nia esforsu, ita nia espetativa ba sobrevivente sira mak, sira la sente mesak ba tinan naruk nia laran. Ita hotu nia kintribuisaun, ita hotu nia esforsu, atu hatan ba sira nia preokupasaun, nune’e ita dignifika sira nia esperansa.
Nia sublina, “sira mós sente katak ukun-an ne’e folin ba sira. CNC nia esforsu atu hatan hodi dignifika sobrevivente sira, vítima sira, tiun no tian sira ne’ebé mak durante ne’e halerik hela ba lia loos, halerik hela ba Justisa, halerik hela ba Reparasaun,”.
Media Chega!
