Dili – Responsavel Kongregasaun Relijious de Jesus no Maria (RJM), Madre Selma D’ Souza rekomenda ba Centro Nacional Chega!I.P atu fahe istória luta povu Timor-Leste nian ba labarik sira atu sira aprende tanba labarik seidauk hatene istória.
Labarik mak futuru nasaun Timor-Leste, Labarik mak esperansa nasaun nian, sira presiza hatene istória tanba istória mak nu’udar identidade nasaun nian.
“Hau nia rekomendasaun ba Centro Chega! Istória ida ne’e tenke fahe ba ema seluk liu-liu ita nia oan sira iha Timor tanba sira seidauk hatene istória”, Madre Selma hato’o rekomendasaun ne’e bainhira lori Irmãs 19 husi Kongregasaun Relijious de Jesus no Maria (RJM) Ulmera, Liquiça hodi vizita ezibisaun istóriku iha Antigo Comarca, Balide-Dili, Segunda-feira, (14/03/2022).
Madre ho nasionalidade Indiana ne’e haktuir, Centro Chega! mos presiza fahe istória Timor-Leste nian ba iha eskola sira iha nivel nasionál to’o iha munisípiu no bele mos fahe ba komunidade internasionál atu sira aprende no hatene Timor nia istória.
Tanba iha relatóriu Chega! hakerek uza lingua tolu hanesan lingua Inglés, Portugés no Tetun. “Ha’u orgullu tebes haree oinsá mak imi (Komisaun CAVR) iha pasiénsia halibur testamuña hotu kedas. Ne’e (Relatóriu Chega!) hanesan buat sagradu. Sira nia istória kona ita nia fuan, sira bele hetan susar hanesan ne’e maibé agora sira bele ko’alia. Sira bele inspira ema seluk liu hosi sira nia istória”, dehan Madre Selma.
Responsavel Kongregasaun RJM ne’e rekoñese, buat ida ne’ebé nia aprende no sei lahaluha mak sofrementu mak hanesan loke dalan ba buat foun ka independénsia. Entaun Timor-Leste hetan ona independénsia ita hotu presiza halo reflekasaun. Ita presiza halo refleksaun kona-ba ita nia istória hodi haklean liutan ita nia esperiénsia.
Enkuantu, Irmã Naterçia da Costa esplika, nia sente kontente hodi vizita mai iha Centro Chega! tanba bele haree istória. Dalabarak ema ko’alia kona-ba istória ita rona de’it, maibé liu hosi vizita ne’e bele hatene klean liutan.
Nia dehan, ema barak seidauk hatene istória tanba ne’e rekomenda ba Centro Chega! atu servisu hamutuk ho instituisaun governu no organizasaun sosiedade sivil sira fahe istória ne’e ba sira atu sira bele hatene.
Irmã Maria Venancio mos hato’o sente ogullu tanba hanesan Timor oan foin primeira vez hakat mai iha Centro Chega! hodi hatene istória saida mak sira luta ba ukun rasik-an, no buat ne’ebé nia aprende husi vizita ne’e mak graffiti sira ne’ebé hakerek iha parede.
“Hau nia rekomendasaun ba Centro Chega! se bele karik bele fahe livru ba ami atu ami bele rai iha konventu tanba dalaruma ami la’o sai vizita maluk sira, ami mos bele fó ba sira atu sira mos aprende istória ne’e no bele hatutan ba maluk joven sira seluk”, Irmã Maria rekomenda.
Irmã Bendita dos Santos mos husu ba Centro Chega! atu fahe tutan istória ba jerasaun foun sira atu sira bele aprende tanba istória mak ita nia identidade. Entaun, istória labele rai de’it maibé presiza halo promosaun ba estudante sira iha eskola Pre-sekundária, Sekundária no Universidade sira tanba liu hosi ida ne’e sira bele hatene.
Media Chega!
