Dili-Centro Nacional Chega!I.P liu husi Divizaun Solidariedade Sosial (DSS) no Divizaun Peskiza Arkivu Istóriku (DPAI) hamutuk ho Koordenadór Nasional Asosiasaun Vitima Konflitu 1974-1999, iha loron Kuarta-feira, 11 Agustu 2021, halo observasaun ba sobrevivente nia uma.

Uma ne’ebé sobrevivente Duarte hela taka ho kalen ferujen, kalen sira ne’e kuak hotu ona, hateke sa’e ba leten hetan de’it kalohan. Uma ne’e mos didin de’it ho piku (bebak) no oras ne’e lahok no kesi de’it ho fiu. Iha uma nia laran taka de’it ho treplek no kalen. Bainhira tama ba uma laran ita sente tauk tanba uma ne’e mos komesa halis ona no fó perigu ba ema nia moris.

Sobrevivente ho naran kompletu Duarte Agosto da Silva hela iha Aldeia Nahaek, Suku Dare, Postu Administrativu Vera Cruz, Munisípiu Dili. Sobrevivente kaben ho Luisa de Fatima Sousa ho oan nain 4 feto 3 mane 1.

Tuir Koordenadór Ezekutivu Sekretariu Nasional Asosiasaun Vitima Konflitu 1974-1999, Domingos Pinto de Araujo Moniz, prezensa Centro Chega! no Asosiasaun Vitima Konflitu 1974-1999, hodi vizita sobrevivente Duarte nia uma mak atu halo survei ka observasaun ba sira nia kondisaun uma no planu Centro Chega! atu halo uma ba nia.

Domingos Pinto esplika, razaun atu harii Uma ba Sobrevivente Duarte tanba nia kondisaun saúde ladi’ak, dalaruma ita ko’alia ho nia lakonek ho ita, ita ko’alia ida nia ko’alia fali buat seluk, alende ne’e mos bainhira loron manas kona nia ulun nia monu derepente de’it. Uluk nia pernah monu, momentu partisipa serimonia levantamentu Marabia, ema hotu haleu nian, iha momentu ne’ebá planu lori nia ba rai liur hodi konsulta nia saude, maibé lakonsege tanba iha situasaun Covid-19.

Centro Chega! no Asosiasaun Vitima Konflitu 1974-1999 ba haree diretamente uma nia kondisaun no sukat kedas uma nia medidas tanba tuir planu Centro Chega! atu halo uma foun ba nia.

“Agora ne’e faze survey atu buka hatene, rai nia luan no rai nia baliza. Antes atu ba iha implementasaun”, dehan Prezidente Asosiasaun Vitima hafoin remata survei kondisaun uma Duarte nian iha Nahaek.

Iha sorin seluk, Luisa de Fatima  Sousa hanesan kaben rekoñese katak, kondisaun saúde nia kaben nian ladi’ak tanba nia hetan moras iha parte ulun. Bainhira nia tensaun ona nia liman no ain book-an ladi’ak mate hotu, entaun nia iha uma de’it lahalo servisu.

“Durante ne’e hau mak esforsu rasik hodi halo atividade hanesan fa’an ai-funan, raut rai metan, hili ahi-oan hodi sustenta familia uma laran no hola labarik sira nia kadernu no roupa eskola, ne’ebe mak oras ne’e asesu hotu edukasaun”, nia afirma.

Nia informa tan katak, ho problema ne’ebé mak nia la’en hasoru tan ne’e, nia husu governu atu bele halo nia uma nomos ajuda nia oan sira hodi bele eskola tanba familia laiha kbiit atu suporta oan sira hodi eskola.

Nia mos agradese ba Centro Chega! no Asosiasaun Vitima Konflitu 1974-1999 tanba bele halo ona survei ba sira nia uma tanba kondisaun uma oras ne’e aat hela maibe pasiénsia hela de’it tanba laiha kbiit finanseiru hodi halo uma foun atu hela.