Liquiça – loron 19 Agostu 2020, Dirijente Asosiasaun Vítima Munisípiu Liquiça Sr. José Serrão Nunes husu ba Estadu no Dioseze atu asegura orijinalidade Rezidénsia Paroko São João de Brito Liquiça ne’ebé sai fatin akontesimentu boot Masakre Liquiça iha loron 6 Abríl 1999.
Tuir José Nunes, espasu balun iha Rezidensia laran dadauk ne’e la hatudu ona nia orijinalidade, tanba ne’e liu husi Centro Chega! nu’udar instituisaun memória atu halo koordenasaun ho Dioseze Maliana no Estadu, nune’e bele tau konsiderasaun ba Rezidénsia Paroko nian nu’udar sítiu ida ho nia valór Istóriku ne’ebé presiza prezerva.
Dirijente Asosiasaun Vítima ne’e hato’o katak hahú kedas tinan 2003, fatin oho martire sira iha Rezidénsia laran hetan modifikasaun husi Amu Paroku sira.
“…Haris fatin rezidénsia nian ne’ebé uluk sai fatin oho martire sira, modifika ona sai kuartu. Ha’u preokupa tebes ho kondisaun rezidénsia daudauk ne’e, karik la iha intervensaun husi Estadu, mak nei-neik ba bei-beik espasu sira iha rezidénsia laran inklui resintu tomak totalmente lakon nia orijinalidade”, tenik José.
Iha fatin hanesan, Sr. Emilio Barreto nu’udar mós Vítima ba Masakre Igreja Liquiça husu ba Governu liu husi Centro Chega! no instituisaun kompetente sira seluk atu tau matan no prezerva fatin Masakre Liquiça, ne’ebé rai memória ema lubuk nian.
Emilio sublińa katak nu’udar vítima la ezije barak ba governu maibé husu ba governu liu husi instituisaun kompetente sira atu asegura no fó valór ba istória vitima sira nian.
Emilio afirma liu tan katak asegura orijinalidade fatin masakre hanesan mós asegura ona istória sobrevivente masakre Liquiça nian.
