Díli, (11 Jullu 2025) – Vise Ministru Asuntu Parlamentar (VMAP), Aderito Hugo da Costa reprezenta Primeiru Ministru (PM) no Ministru Prezidensia Konsellu Ministru (MPCM) abertura semináriu, Festival Kultura Rezistensia Popular (FKRP) 2025 no lansamentu livru ho titúlu “Meraih Cahaya, Memori Kolektif Timor-Leste Pasca-konflik”, no “Jejak-Jejak Ingata, Mengenang Masa Lalu Mencintai Masa Depan”, ne’ebé realiza iha Salaun Konferensia Centro Chega!I.P, Antigo Comarca Balide, iha ámbitu selebrasaun aniversáriu ezisténsia Centro Nacional Chega! Instituto Publiku (CNC I.P) ba dala-8 ne’ebé monu iha loron 17 Jullu (2017-2025), ho tema “Memória Koletiva Dalan ba Rekonsiliasaun”.

Serimonia abertura no lansamentu livru ne’e partisipa husi Membru Governu, Korpu Diplomatiku, Membru Konsellu Asesoria Internasional Chega!, Estrutura Konsellu Administrasaun Chega!, Organizasaun Sosiedade Sivil, Organizasaun Rezistensia Juvenil, Membru Grupu Traballu Prosesu Rekonsiliasaun Timoroan (GT-PRT) no entidade sira seluk.

Serimonia ne’e kompleta ho atividade sira hanesan, liafuan bemvindo husi Diretór Ezekutivu Chega!, abertura no lansamentu husi VMAP, aprezentasaun livru “Meraih Cahaya, Memori Kolektif Timor-Leste Pasca-konflik”, husi Dr. Yoseph Yapi Taum M.Hum. Komentariu livru “Meraih Cahaya, Memori Kolektif Timor-Leste Pasca-konflik”, no “Jejak-Jejak Ingata, Mengenang Masa Lalu Mencintai Masa Depan”, husi PDHJ, Virgilio da Silva Guterres “Lamukan”, Sekretariu Jeral RENETIL, Joaquim A.M.L da Fonseca “Russo” no Ketua Tim 7 FKPTT, Felisberto Amaral. Observasaun ba livru “Meraih Cahaya, Memori Kolektif Timor-Leste Pasca-konflik”, husi VMAP.

Diretór Ezekutivu Chega!, Hugo Maria Fernandes hato’o bemvindo ba konvidadu sira hotu no destaka pontus importante sira kona-ba signifikansia husi serimonia, iha ámbitu aniversariu CNC I.P ba dala-8 no afirma, ezisténsia CNC I.P ba dala-8, numeru ida ne’ebé lori sorte, lori forsa boot atu kontinua servisu.

Diretór argumenta, ezistensia CNC I.P ba dala-8 kontinua servisu ho vizaun ne’ebé hatur iha relatóriu CAVR no CVA nian kona-ba memória pasadu. Lansamentu livru rua nu’udar pasu inisiu no oportunu hahu halo diskusaun kona-ba memória koletiva no loke dalan ba rekonsiliasaun. Memória koletiva mak aliserse ba identidade nasional no baze ba rekonsiliasaun ida autentiku. Livru rua ne’e nu’udar xamada ida ba ita hotu atu hahu no harii tradisaun ho hanoin ne’ebé saudavel kona-ba opiniaun ka hanoin ne’ebé moos, klaru no autentiku nu’udar abilidade ida ne’ebé karun.

Livru rua ne’e konvida ema hotu atu haburas kultura lee, hakerek no involve iha dialogu ho pasadu, atu labele sai todan maibé sai lisaun.

Diretór mos detaka, atividade Festival Kultur Rezistensia Popular nu’udar eventu annual ne’ebé mak Centro Chega! halo oinsa mak hatur aspeitu arte no kultura sai nu’udar komponente importante ida iha ita nia rezistensia.

Iha oportunidade hanesan, Vise Ministru Asuntu Parlamentar (VMAP), Aderito Hugo da Costa reprezenta PM no MPCM, enome nuno governu parabéniza CNC I.P ba dala-8 ho atividade semináriu, FKRP 2025, lansamentu livru ne’ebé hatudu kapasidade Centro Chega!I.P ho ekipa nian ba servisu prezerva memória pasadu, maske servisu todan maibé kontinua servisu la’o ba oin.

Livru “Jejak-Jejak Ingata, Mengenang Masa Lalu Mencintai Masa Depan”, no “Meraih Cahaya, Memori Kolektif Timor-Leste Pasca-konflik”, hatudu Timor-Leste ninia mapa orientasaun klaru ona atu atinji futuru ida ne’ebé pasifiku, justu no prosperu.

Nune’e, livru hanesan meius ba aprendisajen no mos promove rekonsiliasaun. Livru la’os de’it feramenta atu sai informasaun maibé, mos meius atu harii memória koletiva i konsiénsia koletiva ne’ebé sai hanesan espasu ida atu vitima no autór sira bele hasoru malu iha silénsia nia laran ho liafuan sira ne’ebé forma iha paragrafu sira ne’ebé elabora ho matenek.

Livru ne’e mos nu’udar exemplu ida konkretu kona-ba oinsa literatura bele sai instrumentu dame nian husi ita nia nasaun nia viajen naruk. Nune’e enkoraja ema hotu atu lee, atu aprende ho kompriensaun ida atu buras hodi hanoin hikas atu labele tan istória nakukun nian.

VMAP konvida partisipante sira hotu atu uza momentu ida ne’e hanesan inisiu ba dialogu refleksaun no asaun koletiva sira. “Keta husik rai rahun mak falun metin livru sira ne’e iha gaveta ka iha armariu maibé, motiva malu para lee no deskute atu nune’e ita bele hatene, ita mai husi ne’ebé, ita atu ba ne’ebé ho istória hirak ne’e”.

Media Chega!.