Dili – Vise Reitór III Universidade Dili, Hugo Lorenço da Costa haktuir, Centro Nacional Chega! I.P nu’udar instituisaun estadu ida iha papél importante halo prezervasaun ba mémoria pasadu liu-liu  dokumentus istóriku sira ne’ebé kontribui ba luta ukun-an.

Tanba Dokumentus istóriku sira barak mak seidauk rekolla hotu. Centro Chega! presiza halo servisu ida ne’e oinsá mak bele halibur dokumentus istóriku sira nomós liuhosi entrevista lider nasionál sira hodi konta sai istória sai hanesan memória pasadu.

Razaun presiza halo prezervasaun dokumentus istóriku atu nune’e estudante sira hosi eskola Ensinu Baziku, Sekundariu to’o iha Universidade bele asesu. Tanba ohin loron estudante barak mak seidauk  hatene istória.

 “Chega! iha papél importante tebtebes iha ninia servisu tomak liu-liu tekniku, haree oinsá mak atu buka informasaun kona-ba ita nia prosesu luta ho dokumentus mak durante ne’e fó kontribui makas ba luta ne’e rasik”, Hugo ba Media Chega! iha Kampus UNDIL, Maskarinhas-Dili, bainhira sai oradór ba semináriu kona-ba arkivu ne’ebé organiza hosi Centro Chega!, Sabadu (14/05/2022).

Dosente Siénsia Polítika ne’e haktuir, prezervasaun arkivu ne’e iha tipu rua; – Ida, Direita katak, dokumentus orijnal ne’ebé ita bele asesu direita. – Segundu, Indireita katak, dokumentus istóriku ita bele asesu liuhodi meius komunikasaun sosiál hanesan youtobe, facebook, televizaun, radiu, jornal no brosura.

Dokumentus istóriku mak oras ne’e Centro Chega! arkiva ne’e importante tebes no ita konsidera nu’udar dokumentus autentiku ne’ebé tau di’ak sai evidensia forte ida ba jerasaun sira tuir mai bele lee no kompriende.

Nia mós rekomenda ba Centro Chega! katak, se dokumentus istóriku mak Centro Chega! seidauk rekolla hotu tenke esforsu rekolla  dadus, se lae konvida lider nasionál sira para bele konta tuir prosesu hakerek  para halo prezervasaun.

Media Chega!