Díli – (16 Maiu 2025), Estudante Universitáriu sira husi Universidade Nacional Timor Lorosa’e (UNTL), Universidade Dili (UNDIL), Universidade Katolika Timorense (UCT), Universidade da Paz (UNPAZ) no Dili Institute of Tecnology (DIT), ne’ebé partisipa ona iha atividade edukasional hato’o agradesementu ba Centro Nacional Chega!I.P no Universidade da Paz (UNPAZ).
Universitáriu sira hato’o tanba konsidera atividade ne’e importante tebes tanba lori sira mai vizita Museu Chega! hodi haree istória pasadu, vizita sela nakukun nu’udar fatin detensaun, torturasaun no violasaun direitus umanus oin-oin no partisipa mos iha atividade screening filme hatutan memória kona-ba sobrevivente sira nia istória pasadu.
Estudante UCT, Gercia Lizenia Mendes dos Santos, espresa sentimentu kontente ne’e tanba pela primeira vez mai vizita Museu Chega! no haree direitamenta sela nakukun no sente rasik wainhira tama iha sela laran no halo refleksaun katak ukun-an ne’ebé ohin loron ita hetan ne’e lafasil, ema barak hetan torturasaun no violasaun oioin to’o mate.
“Hau orgullu tebes ho museu Chega! tanba mai iha museu ida ne’e aumenta tan hau nia koñesimentu kona-ba istória pasadu luta ba independénsia. Durante ne’e hau rona de’it istória husi ema, maibé hau mai Chega!, hau haree foto no video sira halo hau aprende. Kona-ba Comaca Chega! hau foin mai iha ne’e. Hau husu estudante sira iha eskola hotu-hotu bele mai Chega! atu aprende istória ne’e, haree ita nia lutadór sira nia terus, ita foti hanesan bukae ida ba ita uza iha futuru. Esforsu imi nia-an, ba oin halo nasaun ne’e sai di’ak liu tan”, Estudante Gercia agradese.
Estudante informa-tan katak, istória importante no estudante sira presiza aprende, maibé husu ba Centro Chega!I.P organiza nafatin atividade hanesan ne’e, no konvida vitima no sobrevivente sira konta sira nia istória ita rona husi parte oin-oin, liu-liu parte ida ne’ebé ita seidauk hatene. “Hanesan ohin ami mai haree oinsa ema sira ne’ebé terus ba funu, ema kastigu sira, durante ne’e ami lahatene, ema kastigu ne’e oinsa?, oinsa ema fo hahan?. Tuir mai realidade ne’e hanesan ne’e. Entaun ami sente katak nu’udar jerasaun foun ita tenke dezenvolve nasaun ida ne’e, tanba nasaun ida ne’e atu ukun rasik-an lafasil”.
Dosente UNPAZ, Santino Barros esplika, liu husi atividade edukasional hodi komemora loron internasional Museu ho tema “The Future of Museums in Rapidly Changing Communities” ho tema espesifiku mak “Espasu ba Edukasaun ba Dezenvolve Kreatividade no Hasa’e Koñesimentu kona-ba Istória no Siénsia” ne’e importante tebes.
Liu husi atividade bele lori estudante sira mai vizita Museu Chega! hodi haklean estudante sira nia koñesimentu kona-ba istória pasadu hodi valoriza no dignifika éroi da patria sira.
Entertantu, atividade ne’e partisipa husi estudante hamutuk na’in 50 mai husi Universidade lima hanesan Universidade Nacional Timor Lorosa’e (UNTL), Universidade Dili (UNDIL), Universidade Katolika Timorense (UCT), Universidadde da Paz (UNPAZ) no Dili Institute of Tecnology (DIT) no atividade ne’e implementa husi Chegah Young Ambassador (CYA) periodu 2025 nian ho apoiu finansimentu husi parseiru GIZ Southeast Asia University Partnership for Peace (SAUP).
Media Chega!.
