Dili- Enkontru entre Centro Nacional Chega!I.P ho Ministeriu Turizmu, Komersiu no Industria (MTCI) foti ona desizaun, iha tinan ida ne’e 2022, sei halo rehabilitasaun Uma Adat Tasi nu’udar sítiu istóriku ida iha munisipiu Dili.
Tuir Vise Ministra Turizmu, Komunitáriu no Kulturál (VMTKK), Inácia da Conceição Teixeira informa, razaun ba sira hili Uma Adat Tasi atu halo rehabilitasaun tanba kondisaun Uma Adat Tasi Tolu oras ne’e di’ak no presiza de’it halo koodenasaun servisu ho Prezidente Autoridade Munisipiu Dili.
Nia hatutan tan, rehabilitasaun Uma Adat Tasi ne’e di’ak tanba iha tinan ida ne’e, Amu Papa Francisco tuir planu sei vizita Timor-Leste. Se ita halo ona rehabilitasaun ba Uma Adat Tasi mak sei fó impaktu pozitivu ba públiku.
“Hau haree katak, tuir informasaun ne’ebé mak iha katak Amu Papa atu mai iha Timor signifika katak tenke iha mudansa ba espasu”, dehan Vise Ministra iha enkontru ho Centro Chega! iha sala Gabinete Vise Ministra, Farol-Dili, Kinta-feira, (10 /03/ 2022).
Xefe Departementu Diresaun Nasionál Dezenvolvimentu Turistíku, Arnaldo Freitas reforsa, rehabilitasaun ne’e halo bazeia ba sitíu istóriku tolu hanesan Casa Eropeia, Uma Adat Tasi Tolu no Camara Ecleciastica ne’ebé Ministeriu Turizmu, Komersiu no Industria observa tiha ona.
Nia dehan, Casa Eropeia uma nia kondisaun ne’e di’ak, maibé uma nia kakuluk mak kuak bainhira tempu udan bee tama halo moru nakfera. Camara Ecleciastica ne’e presiza ko’alia ho Amu Bispo. Uma Adat Tasi Tolu nia kondisaun di’ak, ita presiza halo koodenasaun servisu ho Prezidente Autoridade Munisipiu Dili.
Diretór Ezekutivu Centro Nacional Chega!I.P, Hugo Maria Fernandes agradese ba Ministeriu Turizmu Komunitáriu no Kulturál (MTKK) tanba bele hili ona Uma Adat Tasi Tolu hodi hadia iha tinan ida ne’e.
Centro Chega! nia intensaun rua, sitíu istóriku ne’ebé iha; primeiru mak atu monta espozisaun istóriku iha fatin sitíu istóriku. Segundu mak sitíu ne’ebé de’it mak Ministeriu hili ne’e bele iha espasu atu nune’e sobrevivente sira bele loke sira nia loja kafe ou buat seluk. Loke ida ne’e atu nune’e turista sira ba vizita sira bele hetan rendementu husi programa turizmu istóriku ne’e.
Media Chega!
