Sítiu Istóriku Eis KODIM 07 Ainaro lokaliza iha Suku Ainaro, Postu Administrativu Ainaro Villa, Munisípiu Ainaro no fatin ne’e agora dadaun uza nu’udar Sede Postu Administrativu Ainaro Villa.
Eis KODIM 07 Ainaro konsidera nu’udar Sítiu Istóriku ida tanba hanesan ho KODIM sira iha Munisípiu seluk, KODIM Ainaro mos sai sentru detensaun ne’ebé kruél tebes. Fatin ne’e asosiadu tebes ho levantamentu FALINTIL iha loron 20 Agostu 1982 iha Suku Mauchiga, Munisípiu Ainaro.
Bainhira FALINTIL sira halo atake ba Koramil Dare, Sede Polísia Hatubuilico no Postu Hansip sira iha Aitutu, semana hirak tuir mai, Militár Indonézia halo kedan atake ba Mauchiga, no kaptura populasaun sira ne’ebé deskonfia envolve iha levantamentu refere no lori ba dadur no tortura iha fatin ida ne’e. Alende dadur no halo tortura, militár Indonézia mos halo violasaun seksuál hasoru feto sira, baku dadur sira to’o mate, lori sai dadur sira husi fatin ne’e hodi ba oho iha fatin seluk hanesan Jakarta 2 nomos desterra dadur sira ba Illa Atauro.
