Iha loron 7 fulan Dezembru tinan 1975. Iha lokraik, tropa Indonézia sira la’o hakbesik-an ba salaun Matadauru, fatin (cortar animais) iha tempu português nian ne’ebé lokaliza kuaze metru 400 (atus haat) husi parte sul salaun Assistencia, iha fin de estrada Albuqueque nian.

Antes ne’e Fretilin hari´i postu milisia nian ida iha fatin ne’e, hafoin loron 20 fulan Agustu tinan 1975, uainhira sira halo insuresaun armada hasoru UDT ho Apodeti no kontrola kedan sidade Díli. Kuandu to’o iha fatin ne’e, tropa Indonézia sira obriga komunidade sira ne’ebé sei hela iha fatin ne’e hotu-hotu sai ba liur, hafoin komunidade sira sai ona ba liur, tropa Indonézia sira fahe kedan komunidade sira ba grupu rua, grupu ida kompostu husi mane deit, grupu ida seluk kompostu husi feto no labarik sira, hafoin fahe ba grupu rua, Militar Indonézia tiru mate hotu grupu ne’ebé kompostu husi mane. Naran husi ema sira ne´ebé mate iha insidente ne´e mak; Vicente Godinho funsionáriu públiku (idade kuaze 50), Teodoro Godinho (oan husi Vicente Godinho), Lourenco da Conceição,Julio da Costa, Francisco Xavier Luis Pereira ne’ebé koñesidu ho naran Mausale (familia ho Julio da Costa).

Hafoin oho ema nain lima ne’e, loron ida tuir mai iha loron 8 fulan Dezembru tinan 1975, tropa Indonézia sira oho tan ema nain tolu iha fatin ne’ebé hanesan. Sira nain tolu ne’ebé tropa Indonézia sira oho iha loron ne’e mak, José dos Santos (foin alta husi Óspital Lahane), ho nia kolega nain rua Duarte dos Santos ho Manuel Febu.