Dili, 12 Fevereiru 2025 – Centro Nacional Chega!I.P organiza enkontru ho Organizasaun Rezisténsia, Sosiedade Sivíl no Instituisaun Governu sira ne’ebé kompostu husi, Komite 12 Novembru, Dewan Solidaritas Mahasiswa Pemuda Dan Pelajar Timor-Timur (DSMPPTT), ASSEPOL, Asosiasaun Vitima 1974-1999, Forum Komunikasi Pejuang Timor-Timur (FKPTT), FITUN, OPJELATIL, Sagrada Familia, DPP IMPETU, Jerasaun Patriota, RENETIL, ACbIt, AJAR, Asosiasaun HAK, CNJTL, PDHJ, Presidensia Repúblika, Ministériu Negosiu Estranjeiru no Koopersaun (MNEK) no g7+ ba estabelesimentu Grupu Traballu Prosesu Rekonsiliasaun Timoroan (PRT), ne’ebé realiza iha Salaun Konferensia Centro Chega! Antigo Comarca Balide-Dili. Atu hatene klaru liu-tan informasaun klik iha ne’e.

Iha enkontru ne’e, Asesor Polítika Prezidensia Repúblika, Alexandrino Xavier Araújo, halo uluk introdusaun kona-ba politika rekonsiliasaun husi Prezidensia Republika ne’ebé hanesan mandatu ida husi Prezidente nian, hodi halibur hotu hanoin husi Timoroan iha ne’ebé de’it, inklui iha Timor Osidentál, no liu husi enkontru ne’e, parte Prezidensia Repúblika mós hakarak rona hanoin no ideia husi Organizasaun Reziténsia no Organizasaun Juvenil sira relasiona ho intesaun vizita husi Timoroan iha Timor Osidentál mai Timor-Leste.

Entretantu, Diretór Ezekutivu Centro Nacional Chega!I.P Hugo Maria Fernandes, iha nia aprezentasaun hateten Rekonsiliasaun la’os atu lori fila Timoroan sira ne’ebé agora hela iha Timor Osidental/NTT (Nusa Tengarah Timur) atu mai fali iha Timor-Leste, maibé atu hadi’a fali ita nia relasaun ne’ebé naksalak iha tempu pasadu.

Tuir Hugo Fernandes, rekonsiliasaun nu’udar prosesu ida, ne’ebé tenke iha arependementu, rekoñesa sala no husu deskulpa, liu-liu husi autór sira ne’ebé envolve iha krime ne’ebé akontese iha pasadu no iha vontade di’ak husi vítima sira atu bele simu.

Nia hatutan, enkontru  ida ne’e nu’udar asaun kontinuasaun ba Deklarasaun Dame Ambeno ne’ebé Timoroan sira husi Timor-Leste no Timor Osidental deklara hamutuk ba dame bainhira sira partisipa iha Festival Fronteira 2024 iha Ambeno Oecusse, husi loron 14 to’o 18 Outubru 2024. Nune’e liu husi enkontru ida ne’e bele estabelese Grupu Traballu ba Prosesu Rekonsiliasaun Timoroan.

Durante diskusaun, Organizasaun Rezisténsia, Sosiedade Sivíl no Instituisaun Governu sira deklara sira nia protidaun apoiu inisiativa atu estabelese Grupu Traballu Prosesu Rekonsiliasaun Timoroan, maibé husu nafatin ba Estadu no Governu Timor-Leste atu fó atensaun ba Asuntu Reparasaun vítima sira nian iha Timor-Leste. Partisipante iha Enkontru estabelesimentu Grupu Traballu PRT hamutuk nain 30 resin.

Media Chega!.