Dili – (Kinta-feira, 19 Maiu 2022), Prezidente Republika Demokratika Timor-Leste, Francisco Guterres “Lu-Olo” rekoñese Memórial Primeiru Prezidente RDTL, Francisco Xavier do Amaral nu’udar mós Proklamadór no Primeiru-Ministru Primeiru Governu RDTL, Nicolau dos Reis Lobato ho ninia Gabinete kompostu Ministrus 11 no Vise-Ministrus 7 ne’ebé halo ona inagurasaun iha Palásiu Nobre-Lahane nu’udar konseitu Centro Chega! nian.
PR haktuir, konseitu ida ne’e Centro Chega! aprenzenta liuhosi proposta ho objetivu atu fó omenájen ba sira nu’udar rekoñesimenentu Estadu Timor-Leste nian hodi hatur iha fatin istóriku ida ne’e. Omenájen permanente ida ba ita-nia fundadores Estadu, ne’ebé hatudu sentidu nasionalista no patriótiku. Biar hatene iha risku lakon vida, ita-nia maun no bin sira hamriik ho barani no determinasaun hatur Timor-Leste iha mundu, nu’udar País soberanu, livre no independente.
“Ho haksolok mak Prezidente Repúblika simu proposta hosi Centro Nacional Chega!I.P atu harii memorial ida ne’e iha Palásiu Nobre-Lahane”, dehan PR Lu-Olo liuhosi diskursu Serimónia inagurasaun Memórial Primeiru Governu RDTL, iha Palasiu Nobre-Lahane-Dili.
Lu-Olo afirma katak, Centro Chega! aprezenta konseitu ida furak oinsá hakfilak área Palásiu Nobre-Lahane ba sítiu istóriku tanba Palásiu ne’e, nu’udar edifísiu ho arkitektura karaterístiku hosi tempu kolonial Portugés, iha tiha ona valor istóriku as. Ninia valor sa’e aas liután tanba iha ne’ebá mak akontese eventu dahuluk relasiona ho hahú prosesu konstrusaun Estadu Timor-Leste.
“Ha’u hein katak, iha tempu badak, entidades relevantes Estadu Timor-Leste bele haree oinsá nakfilak tiha área Palásiu Lahane ba sítiu istóriku ida ne’ebé hamoris Memórial kona-ba períodu kolonizasaun Portugeza no kona-ba eventus hosi 1974 to’o 1999”, nia fiar.
Memoriál importante ida ne’e, iha área Palásiu Nobre-Lahane “bele tama ona iha roteiru istóriku-kultural-edukativu. Ha’u fiar katak sei sai mós referénsia di’ak ida ba estudante sira, ba jerasaun foinsa’e sira no mós ba peskizadór sira, turista hosi rai-laran no rai-li’ur”.
Prezidente Eleitu, José Ramos Horta informa, agradese ba inisiativa Prezidente Republika nian tanba bele halo Memóriall ida di’ak tebtebes ho figura boot rua, Primeiru Prezidente RDTL, Francisco Xavier do Amaral nu’udar mós Proklamadór no Primeiru-Ministru Primeiru Governu RDTL, Nicolau dos Reis Lobato ho ninia Gabinete.
Familia Saudozo Primeiru-Ministru Primeiru Governu RDTL, Nicolau dos Reis Lobato, Rogeiro Lobato dehan, hanesan familia agradese tebes ba Prezidente Republika ba inisiativa di’ak ida ne’e tanba bele harii ona Memórial Primeiru Governu RDTL iha Palasiu Nobre Lahane-Dili.
Enkuantu, partisipa iha serimónia inagurasaun ne’e mak Prezidente Eleito, Dr. José Ramos Horta, Primeiru Ministru, Taur Matan Ruak, Prezidente Parlamentu Nacional, Aniceto Guterres, Membru Governu no entidades sira seluk.
Media Chega!
