Dili – (8 Abril 2025), Diretór Ezekutivu Centro Nacional Chega!I.P, Hugo Maria Fernandes hateten, Centro Nacional Chega!I.P hamri’ik nu’udar institutu públiku ida ne’ebé estabelese ho dekretu Lei no. 48/2016. Centro Chega! nia vizaun mak: “Sosiedade ida ne’ebé inkluzivu, la repete istória passadu nian, moris iha dame, no respeitu ba direitus umanu”. Centro Chega! nia misaun mak: “Harii sentru Pós-konflitu ne’ebé prezerva memória passadu nian hodi promove direitus no valór umanu, harii parseria nasionál no internasionál hodi reforsa rede servisu sira atu implementa rekomendasaun sira husi Relatóriu Final Comissão de Acolhimento, Verdade e Reconciliação (CAVR)-Chega! No Comissão da Verdade e Amizade (CVA) – Per Memoriam Ad Spem, sira ne’ebé relevante”.
Hatan ba ida ne’e, mak iha tinan 2023, liu husi polítika IX Governu konstitusional nian, lideradu husi Primeiru Ministru (PM), Kay Rala Xanana Gusmão fo fiar ba Centro Nacional Chega!I.P atu promove rekonsiliasaun no dame iha nasional no internasional.
“Iha 2023 polítika Nuno Governu konstitusional nian fo responsabilidade mai iha Centro Chega! atu promove rekonsiliasaun no dame iha nasional no internasional”, dehan Diretór Ezekutivu Chega!, Hugo iha diskursu enkontru Grupu Traballu Prosesu Rekonsiliasaun Timoroan (PRT), ne’ebé realiza iha Salaun Konferensia Centro Chega!I.P, Museu Chega! Antigo Comarca Balide.
Hugo haktuir, hatan ba polítika IX Governu nian, mak Centro Chega!I.P iha 2023 hahu halo mobiliza , organiza no koordena ho Grupu Traballu Prosesu Rekonsiliasaun Timoroan (PRT) ida ne’e liu husi eventu boot ida hanaran Ferstival Fronteira 2023 ne’ebé realiza iha Maliana, Munisipiu Bobonaro.
Ferstival Fronteira 2023 nu’udar instrumentu ida atu fasilita Timoroan sira iha organizasaun rezistensia hasoru malu ho Timoroan sira iha Nusa Tengarah Timur (NTT) no iha tinan 2024 ne’ebé realiza iha Rejiaun Administrativu Espesial Oekuse Ambeno (RAEOA) no hamosu deklarasaun Dame Ambeno.
Pontus importante husi deklarasaun dame Ambeno ne’e mak, Timoroan sira tenke hahu tur hamutuk atu hakotu tiha vingansa no diversidade polítika. Esforsu ba rekonsiliasaun tenke to’o iha nivel komunidade kraik atu hakotu vingansa no labele husik ba jerasaun sira.
Husi deklarasaun ne’e mak mosu Grupu Traballu Prosesu Rekonsiliasaun Timoroan (GT-PRT) ne’ebé mak mai husi organizasaun rezisténsia, organizasaun sosiedade sivil no instituisaun estadu no governu hamutuk atu estabelese mekanizmu rekonsiliasaun ida di’ak uza hodi rezolve problema.
Media Chega!.
