Dili – (08 Abril 2025), Primeiru-Ministru Kay Rala Xanana Gusmão fó apoiu tomak ba Grupu Traballu Prosesu Rekonsiliasaun Timoroan (PRT) tanba Grupu Traballu ne’e mai husi organizasaun rezisténsia, organizasaun juvenil, instituisaun estadu no instituisaun governu ne’ebé iha seriedade ba servisu prosesu rekonsiliasaun nian.
Primeiru-Ministru subliña, servisu Grupu Traballu liga ho prosesu rekonsiliasaun ne’e nu’udar knar ida ne’ebé todan maibé tenke la’o tanba sei haree kazu por kazu no sei la’o iha teritoriu Timor laran tomak hodi identifika problema, halo aprosimasaun, depois nahe biti boot hodi halo rekonsiliasaun entre Timoroan sira hahú husi 1974-1999.
“Ita boot sira nia servisu ne’e sei makas tebtebes. Servisu ne’e Timor tomak la’os ida de’it, imi haree parte por parte kada Postu idak-idak. Ida ne’e mak problema boot. Hau sente katak diskusaun ohin ne’e kapas tebetebes”, dehan Xefe Governu iha diálogu ho Grupu Traballu Prosesu Rekonsiliasaun Timoroan ne’ebé estabelese husi Centro Nacional Chega!I.P, iha Salaun Konferénsia Centro Chega! Antigo Comarca Balide Dili.
“Konta ho ha’u nia kontribuisaun, karik presiza ha’u tun mos ha’u tun ho imi. Hamutuk ita sei la’o, ita ba, ita ba responde preokupasaun sira ne’e. sira hein hela. Dalaruma ita tur ita hanoin ba kotuk todan, todan duni ne’ebé ha’u fiar katak ita boot sira hotu servisu hamutuk ba liu-liu responsavel sira kuandu iha momentu atu atua iha fatin ne’ebé difisil ita hotu ba”, Primeiru-Ministru afirma.
Primeiru Ministru hato’o obrigado wain ba ekipa servisu ne’ebé konvida ona nia hodi partisipa iha atividade ne’e. “Obrigado ita boot sira lori hau mai to’o iha ne’e hodi ita ko’alia kona-ba problema ida sensitivu tebtebes i la’os sensitivu iha momentu ida ne’e. Problema se ita lakonsege rezolve, oan barak iha tinan sira mai ne’e”.
Enkuantu, Portavoz Grupu Traballu Prosesu Rekonsiliasaun Timoroan (PRT) Joaquim Russo Fonseca esplika, Primeiru Ministru nia prezensa iha enkontru entre Grupu Traballu ne’e hatudu pasu pozitivu atu la’o ba oin kona-ba asuntu rekonsiliasaun.
Enkontru ne’e partisipa mos husi Vise Ministru Asuntu Parlamentar (VMAP), Aderito Hugo da Costa ho Estrutura Konsellu Administrasaun Centro Chega!I.P. Antes hahú Primeiru-Ministru hala’o uluk vizita ba Museu Chega! hodi haree ezibisaun no sela nakukun.
Media Centro Chega!.
