Dili, 17 Jullu 2021, Primeiru-Ministru (PM) Sr. Taur Matan Ruak hato’o parabens ba Centro Nacional Chega!I.P ne’ebé komemora ona nia loron Aniversáriu ezisténsia ba dala-4 iha Timor-Leste.

Mensajen Primeiru-Ministru nian ne’e, tatoli husi Xefe Gabinete Primeiru Ministru, Dr. Azevedo Marçal, liu husi diskursu komemorasaun Aniversáriu Centro Chega! ba dala-4, iha edifisiu Centro Chega! Antigo Comarca Balide-Dili.

“Em nome Sua Exelénsia Primeiru Ministru Sr. Taur Matan Ruak hakarak parabeniza Centro Chega! ba tinan 4 nu’udar institutu públiku ne’ebé tutela diretamente ba Gabinete Primeiru Ministru nian ne’ebé estabelese ho mandatu promove no implementa rekomendasaun Relatóriu Chega! no Relatoriu Per Memoriam Ad Spem”, nian informa.

Nia subliña, durante tinan 4 nia laran Centro Chega! dezenvolve makaas tebes entermus, institusionalmente iha Estrutura Konsellu Administrasaun (KA), Diretór Ezekutivu (DE) no Fiskal Úniku ne’ebé halo servisu ho di’ak haree husi relatóriu servisu no planu estratejiku tinan 5 nia ne’ebé lansa ona.

Haree ba progresu hirak ne’e, polítika PM nian kontinua fó apoiu ba Centro Chega! nia programa hodi estabelese ekipa liña ministeriál sira hodi implementa programa Centro Chega! ba iha liña ministériu idak-idak atu integra iha sira nia polítika no programa sira.

Alende ne’e, Dr. Azevedo Marçal apresia ba tema aniversáriu nian mak “Memorializasaun Nu’udar Dalan Dignifika Sobrevivente”, tema ida ne’e aliña duni ho politika no prioridade VIII Governu nian iha aspeitu inkluzaun sosiál.

Iha fatin hanesan, Diretór Centro Nacional Chega!I.P Sr, Hugo Maria Fernandes dehan, tinan ida ne’e Centro Chega! selebra nia ezisténsia ba dala 4 ho tema “Memorializasaun Nu’udar Dalan Dignifika Sobrevivente”, signifika Centro Chega! hakarak fó atensaun liu ba sobrevivente sira ne’ebé mukit liu ne’ebé kontinua moris iha situasaun difisíl nia laran.

Diretór Centro Chega! agradese ba Parlamentu Nasional tanba kontinua aloka orsamentu ba Centro Chega! agradese mos ba Primeiru Ministru tanba nafatin fó konfiansa politika no orientasaun polítika iha VIII governu konstitusional ida ne’e, hodi hatur polítika governu nian hatama Centro Chega!  nu’udar prioridade governu nian.

Nune’e mós Prezidente Konsellu Administrasaun Interinu Pe. Juvito do Rego konsidera, aniversáariu Centro Chega! ba dala-4  ne’ebé hala’o tuir misaun no dekretu lei no. 48/2016 ne’ebé esplisita Centro Chega! ninia papel atu promove implementasaun rekomendasaun CAVR nian kona-ba institusionalizasaun memória nian no formasaun kona-ba direitus umanus liu husi edukasaun no formasaun, no solidariedade ba sobrevivente sira ne’ebé vulneravel liu.

Enkuantu, iha serimonia komemorasaun aniversariu Centro Chega! ba dala 4 partisipa husi Prezidente Palamentu Nacional, Xefe Gabinete Primeiru Ministru, Korpu Diplomátiku, organizasaun sosiedade sivil, sobrevivente no inklui parseiru estratéjiku sira seluk ho total partisipante hamutuk atus ida resin.