Istória Pasadu Centro Nacional Chega!
Hafoin akontese Movimentu Anti Komunista ne’ebé lansa husi Movimentu Armadu UDT iha loron 11 Agostu 1975, iha loron ne’ebé hanesan iha loron 11 Agostu, Fretilin ne’ebé ho baze iha Aileu, aprezenta lista kondisaun hamutuk 13 ba Administrasaun Portugés. Husi kondisaun sira ne’e inklui dezarma kilat UDT nian no fó responsabilidade seguransa ba Soldadu Timorense, ho razaun katak la iha ona fiar ba Polisia (Portugés). Entaun parte Portugés haruka ba Rogerio Lobato, nu’udar Militár Timor Oan ida ho deviza boot liu iha Exérsitu Portugés. Maibé ne’e sai oin seluk, no nia halo papel importante bainhira fila mai Dili no konvense maioria soldadu Timoroan hodi adere ba Fretilin. Maske antes ne’e promete atu mantein neutralidade polítika (apartidarismo), soldadu Timorense tama iha polítika livre foun hanesan ho sira nia maluk sivíl seluk. Iha loron 15 Agostu, Komite Sentrál Fretilin iha Aileu anúnsia saida mak sira bolu “Rekomesa luta armada jerál kontra traidór hotu no inimigu povu nian”. Iha loron 20 Agostu, Fretilin lansa atake hasoru UDT.
Iha loron 18 Agostu, restu husi pesoál funsionariu administrasaun Governu Portugés retira ba Bairru Farol, fatin ne’ebé maioria husi sira hela ba no forma zona sentral iha Dili ne’ebé deklara-an neutru. Parkedista Portugés sira mós ba zona neutru ne’e hodi halo protesaun.
Iha loron 20 Agostu 1975, iha tuku 01:00, Rogerio Lobato ho Hermenegildo Alves lansa atake armada Fretilin ida, hodi asume kontrolu ba Kuartel Jerál Ezersitu Tropa Portugés sira nian iha Taibessi no detein mós Tropas Portugés ne’ebé hela iha fatin ne’ebá, inklui Vise Xefe Estadu Maiór Portugés. (Nune’e loron 20 Agostu konsidera nu’udar loron moris Falintil nian).
