Ekipa Centro Nacional lideradu husi Diretór Ezekutivu Sr. Hugo Maria Fernandes iha loron 17 Jullu 2020 halo audiénsia ho Exelénsia Ministra Negosius Estranjeirus no Kooperasaun Dra. Adaljiza Magno iha nia Edifisiu Praia dos Coqueiros – Dili, hodi atualiza informasaun sira ne’ebé Centro Chega! halo durante mandatu iha primeiru mandatu (2017 – 2020) no fahe mós informasaun relasiona ho implementasaun Rekomendasaun Chega! no Per Memoriam Ad Spem ne’ebé kompete ba MNEK.

Iha audiénsia ne’e, Diretór Ezekutivu Centro Chega! enfaze fali responsabiliza MNEK ba apoiu implementasaun Rekomendasaun Chega! no CVA hanesan, Harii Komisaun ida ba buka ema lakon tantu Gerileiru/Luta Na’in Timoroan sira ne’ebé Militár Indonézia sira oho no lori lakon, nune’e mós labarik Timoroan ne’ebé lori ho forsada ba Indonézia iha tempu okupasaun Indonézia.

Pontu seluk ne’ebé foka iha audiénsia ne’e mak lori fali arkivu Timor-Leste nian sira ne’ebé agora dadaun rai hela  iha Indonézia, no hari Sentru ba dokumentasaun no rezolusaun konflitu ne’ebé ho baze iha Timor-Leste liu husi parseria ho Indonézia, no husu atu arkivu hotu husi Relatóriu CVA nian ne’ebé entrega ona mai Timor-Leste bele ba rai iha Centro Chega!

Alende pontu sira ne’ebé mensiona iha leten, Diretór Ezekutivu mós enfase fali no husu apoiu MNEK atu husu ba Governu Indonézia hamoos tiha Timoroan balun nian naran ne’ebé agora dadaun sei iha nafatin Lista Metan.

Hafoin rona aprezentasaun husi Diretór Ezekutivu Centro Chega!, Ministra Negosiu Estranjeiru no Kooperasaun Dra. Adalgiza Magno fó nia apresiasaun ba serbisu Centro Chega! no hato’o mós protidaun atu servisu hamutuk ba implementasaun rekomendasaun sira husi relatório Chega! no CVA ne’ebé kompete ba Ministériu Negósiu Estranjeiru no Kooperasaun.

Iha oportunidade ne’e, Ministra mós aprezenta kedas alternativu hodi nomeia Pontu Fokál atu servisu hamutuk ho Centro Chega! hodi fasilita implementa Rekomendasaun Chega! no CVA.