Dili, Ekipa Centro Nacional Chega! ne’ebé lidera husi Diretór Ezekutivu Interinu Sr. Metodio Caitano Moniz iha loron 29 Jullu 2021 kontinua halo enkontru ho Diretór Jerál no Diretór Nasionál sira iha Ministériu Justisa, atu aliña polítika no inkoorpora servisu iha Planu Anual no Orsamentu 2022, hodi implementa Rekomendasaun sira husi Relatóriu Chega! no Per Memoriam Ad Spem. Enkontru ne’e realiza iha Salaun Enkontru Ministériu Justisa Caicoli – Dili.
Iha enkontru ne’e, Diretór Centro Nacional Chega! Sr. Metodio Caetano Moniz akompaña husi Diretor Divizaun Relasaun Externa Komunikasaun no Advokasia (DREKA), Sr. Gaudencio Soares Souza, Diretór Divizaun Solidariedade Sosial (DSS), Sr. Nelson Seixas, Diretór Divizaun Edukasaun no Formasaun (DEF), Sr. Vicente Borges Maia, Xefe Divizaun Peskiza Arkivu Istoriku (DPAI) Sr. Aventono J. B. Ximenes halo enkontru ho Diretór Jerál no Nasional sira husi Ministériu Justisa.
Durante enkontru, Diretór Divizaun Solidariedade Sosial (DSS), Sr. Nelson Seixas aprezenta kona-ba Nota Entendementu ne’ebé parte rua asina tiha ona iha tinan hirak liu ba no oinsá atu aliña polítika no inkoorpora planu 2022 nian, inklui politika asesu sertidaun RDTL ba Vítima Violasaun Seksuál 1974 -1999 sira nia oan sira.
Responde ba kestaun ne’e, Diretora Jerál Ministeriu Justisa (MJ), Sra. Marcelina Tilman dehan, Ministériu Justisa liu husi servisu notariadu bele fasilita hodi halo sertidaun RDTL ba Vítima Violasaun Seksuál sira nia oan, importante mak tenke liu husi Asosiasaun Vítima sira iha munisipiu hodi halo deklarasaun, hafoin lori ba notariadu hodi bele halo atendementu ho lalais.
Nia esplika, atendementu sertidaun RDTL ba komunidade baibain ne’e barak los, entaun susar atu identifika vítima violasaun seksuál husi tinan 1974-1999 sira nia oan. Tan ne’e nia sujere, di’ak liu presiza halo karta deklarasaun husi asosiasaun vitima tanba sira besik liu asosiasaun vítima iha munisípiu sira no postu administrativu sira.
Enkuantu Diretór Diresaun Nasional Servisu Rejistu Notariadu (DNSRN), Sr. Crisogno da Costa Neto reforsa, ka’olia kona-ba atendementu sertidaun RDTL ba vitima nia oan sira ne’e importante no ita tenke halo.
“Ita presiza koopera ho asosiasaun vítima sira, nune’e bele halo deklarasaun, naran labarik sira ne’ebé mak sai vitima ne’e rejistadu. Hafoin sira mai ho lista ba iha diresaun notariadu kada munisipiu hodi prosesa sira nia Sertidaun RDTL”, Diretór Notariado sujere.
Ita presiza husu deklarasaun husi asosiasaun vitima nian ne’e para sira bele hatene katak ema ne’e mai husi vitima violensia seksual 1974-1999 nia oan atu ita bele fó prioridade hodi halo atendementu.
Enkuantu, Diretór Ezekutivu Interinu, Centro Nacional Chega!I.P, Sr. Metodio Caetano Moniz iha esperansa katak, saida mak ita ko’alia ne’e bele inkoorpora iha planu annual MJ nian hodi nune’e ita laiha impedementu ruma iha terenu ba implementasaun atividade ba tinan oin tanba tau hotu ona iha kalendariu.
