Mês Korem (Komando Resort Militer) Dili, lokaliza iha Av. Prezidente Nicolau Lobato, Kolmera-Dili. Hafoin insuresaun armada iha Marabia, iha loron 10 fulan juñu, fatin ne’e sai fatin detensaun ne’ebé Militar Indonézia husi unidade Komando Pasukan Khusus (Kopassandha) sira uza hodi halo interogasaun no tortura ne’ebé kruel ba ema sira ne’ebé involve iha insuresaun armada refere nomos ema sivíl sira ne’ebé la involve direita maibé iha relasaun familia ho ema sira ne’ebé involve direitamente.

Hafoin akontesementu ne’e Militar Indonézia kaptura ema kuaze na’in 200 resin hodi ba detein no tortura iha fatin ida ne’e. Meius tortura ne’ebé Militar Indonézia husi unidade Komando Pasukan Khusus (Kopassandha) sira halo ba detenadu sira iha fatin ne’e mak; xoke eléktriku ba detenadu sira nia isin no órgaun jenitais, kesi hamutuk detenadu na’in rua nia órgaun jenitais no baku detenadu ida nune’e detenadu seluk mos sente moras wainhira tali ne’ebé kesi órgaun jenitais bo’ok-an, baku ho kilat lolon, sunu detenadu sira nia isin ho sigaru nia kla’ak, hoban detenadu sira nia ulun iha tanke bee durante minute rua, lori lafaek rai maran hodi tau iha detenade sira nia isin leten hafoin sira dada nia ikun nune’e lafaek rai maran tata detenadu sira.

Husi tortura ne’ebé akontese durante periodu ida ne’e rezulta ema mate iha fatin ne’e no lakon hamutuk na’in 9 husi detenadu atus 200 resin ne’ebé detein iha fatin ida ne’e. Naran ne’ebé konsege identifika husi ema na’in 2 ne’ebé mate iha fatin ne’e mak Jordão Fernandes, membru kopassandha sira hanehan to’o nia iis kotu, Luis Mau, mate tanba hoban nia ulun ba bee iha tanki laran. Ema sira ne’ebé detein no hetan tortura iha fatin ne’e mak, Maria de Fatima Pinto, David Dias Ximenes, José Gomes Guterres, Pedro Manek no Bernadino Ximenes Villanova.