Dili, (09 Juñu 2022) – Livru rua; – Ida, ho titulu “Hau Nia Dalan Ba Libertasaun” hakerek hosi saudoso Alberto da Costa “Bua” no – Rua, “A Minha Memória” hakerek hosi Aurora Assunção Quintão ne’ebé halo lansamentu hosi Vise Ministru Edukasaun Juventude no Desportu (MESJD), Antonio Guterres hamutuk ho Centro Nacional Chega!I.P no Komite Orientadór 25 (CO25-sigla Portugés) nu’udar muzeum no ensiklopedia ida.
Tanba konteúdu hosi livru rua ne’e lako’alia de’it kona-ba sira nai’n rua (Alberto ho Aurora) nia istória maibé, livru rua ne’e ko’alia kona-ba ema ne’ebé besik sira, ema ne’ebé la’o hamutuk ho sira no ema ne’ebé hamutuk ho sira ho vizaun hanesan hodi luta ba ukun-an.
Diretór Ezekutivu Centro Nacional Chega!I.P, Hugo Maria Fernandes informa, tinan kotuk Centro Chega! hamutuk ho eskritór Timor-oan Paulo Amaral “Bravo” halo ona lansamentu livru ho titulu “As Memorias da Guerra 1975-1978”, livru ne’e nia sitasaun hateten “todas as guerras deixa marcas para toda a vida são as memorias que deiso ficar no museum”.
Ohin ita halo lansamentu ba livru rua; – Ida ho titulu “Hau Nia Dalan ba Libertasaun” hakerek hosi saudoso Alberto da Costa “Bua” no – Rua, “A Minha Memória” hakerek hosi Aurora Assunção Quintão sira mai ho pensamentu hanesan.
Tanba iha konteudu livru ne’e ko’alia kona-ba memória sira iha tinan 4 iha ailaran no tinan 20 iha Manatutu no sira transforma memória ne’e sai livru ida ne’e hatudu katak memória sira ne’e sai hanesan muzeum ida no nu’udar ensiklopedia ida ba ita atu aprende.
Lansamentu livru rua ne’e hanesan dalan ida atu dokumenta no rejista memória sira pasadu nian tanba iha rekomendasaun hosi relatóriu Chega! hateten katak estadu tenke esforsu atu fó biban ba ema sira ne’ebé mak durante luta kontribui ba ukun rasik-an no husik hela sira nia memória.
Ba ne’e, Centro Chega! konsidera katak livru rua ne’e importante tanba husik hela memória pasadu tanba memória ne’e nu’udar ema nia rejistu pesoál, ema nia dezafius sira, ema nia lala’ok sira tomak ne’ebé mak dokumentu sira lahakerek sentimentu ema nian.
Nune’e, Centro Chega! agradese ba eskritora Aurora no eskritór Alberto ba ita boot sira nia sabedoria pasiensia hodi bele hakerek ita boot sira nia memória no ita hein katak ho lansamentu livru ne’e saudoso Alberto iha maromak nia kadunan santo nia bele kontente iha ne’ebá.
Centro Chega! konsidera katak, livru rua ne’e sai referensia ida di’ak no importante ba Centro Chega! ba CO25 ba CCLN, MEJD no AMRT atu sai nu’udar ponte ba referénsia.
Enkuantu, iha serimónia lansamentu ne’e akompaña hosi Vise Prezidente Parlamentu Nasionál (VPPN), Maria Angelina Lopes Sarmento, Prezidente Komisaun Funsaun Publika (PKFP), Faustino Cardoso Gomes no partisipa hosi entidades relevante sira ne’ebé hala’o iha salaun konferensia Centro Chega! Antigu Comarca Balide-Dili.
Media Chega!
