Manatuto – (14 Jullu 2025), IX Governu Konstitusional liu husi Vise Ministru Asuntu Parlamentar (VMAP) hamutuk ho Centro Nacional Chega!I.P halo ona lansamentu fatuk dahuluk ba Uma Memória ba Esperansa (UMbE) ba sobrevivente sira ne’ebé moris ho kondisaun vulneravel liu, ne’ebé realiza iha Suku Kairui, Postu Administrativu Laleia, Munisípiu Manatuto.
Serimonia ofisial ne’e lansa, husi Vise Ministru Asuntu Parlamentar (VMAP), Aderito Hugo da Costa hamutuk ho Prezidente Konsellu Administrasaun Chega!, Manuel Pereira ho autoridade sira iha Munisipiu Manatuto no mos parseiru sira.
UMbE ne’ebé Vise Ministru ho Centro Chega!I.P lansa hamutuk 6 ne’ebé Centro Chega!I.P sei konstrui no oferese ba sobrevivente sira iha tinan ida ne’e (2025) mak hanesan Sobrevivente, Irenie Bi-bui Fatima de Sousa, iha Suku Kairui, Postu Administrativu Laleia, Munisípiu Manatuto.
Sobrevivente Francisco Vital Ximenes, Suku Buibau, Postu Administrativu Baucau Vila, Munisípiu Baucau, Ana Freitas, Suku Uailili, Postu Administrativu Baucau Vila, Munisípiu Baucau, Ana G. de Lima S. Lemos Almeida, Suku Soro, Postu Administrativu Ainaro, Munisípiu Ainaro, Agata da Silva, Suku Berloic, Postu Administrativu Alas, Munisípiu Manufahi, Alexandrino da Costa, Suku Fatukahi, Postu Administrativu Fatuberliu, Munisípiu Manufahi..
Centro Chega!I.P harii ba sobrevivente sira tanba sira moris ho kondisaun vulneravel liu tanba kauza husi konflítu pasadu 1974-1999. Objetivu harii uma ba sobrevivente sira atu dignifika no valoriza sira nia kontribuisaun luta ba ukun rasik-an.
UMbE harii ho medida 9×7 kompostu husi, Kuartu 3, sala 1, haris fatin 1, varanda 1 no mos dapur, kompleta ho instalasaun eletrisidade, plafon no keramik, exeptu dapur ho totál kustu mais ou menus $ 14.800 to’o $ 17.000, depende ba distansia transportansaun material uma nian. Osan sira ne’e inklui ona selu badae. Implementadór projetu mak Asosiasaun Vítima Konflítu Politiku 1974-1999 (AVKP) nu’udar mos parseiru Centro Chega!I.P nian.
Antes ne’e, Centro Chega!I.P harii ona UMbE hamutuk 20 ba sobrevivente sira. Iha tinan 2025, Centro Chega!I.P liu husi Divizaun Servisu Reparasaun (DSR) halo tan UMbE 6 ba sobrevivente sira bazea ba rekomendasaun sira husi relatóriu Chega! no PMAS liu-liu ba asuntu reparasaun nian. Divizaun ida ne’ebé responsavel ba programa ida ne’e mak Divizaun Servisu Reparativu (DSR) tanba sira nia servisu mak estabelese programa solidariedade apoiu ba sobrevivente no grupu vulneravel sira ne’ebé hasoru violasaun direitus umanus iha pasadu.
Detallu informasaun klik: PDF
Media Chega!.
