(Dili, 25 Abril 2024) – Centro Nacional Chega! Instituto Publiku (CNC I.P) organiza konferensia nasional ho tema “Tinan 50 Momentu Istótriku 25 Abril Refleksaun Kona-ba Deskolonizasaun iha Timor-Leste 1974-1975”. Konferensia nasional ne’e realiza iha Salaun Konferensia Centro Chega!, Antigo Comarca Balide-Dili.
Objetivu husi konferensia ne’e mak atu hasa’e koñesimentu públiku nian kona-ba dinámika situasaun sosiál, polítika no militár nian iha prosesu deskolonizasaun tinan 1974-1975. Konferensia ne’e mos hamosu komprensaun públiku nian kona-ba ema-nia esperiénsia no esperansa sira durante períodu mudansa boot prosesu deskolonizasaun nian, no foti lisaun aprendijazen ba harii pas no rekonsiliasaun.
Loron 25 Abríl 2024 marka tinan 50 Revolusaun Ai-funan (Revolução dos Cravos) iha Portugál. Revolusaun ida-ne’e implika tranzisaun ba demokrásia iha Portugál no ninia impaktu mai iha Timor-Leste momentu ne’ebá mak prosesu deskolonizasaun.
Dinámika situasaun Timor-Leste nian iha prosesu deskolonizasaun refere akontese mudansa iha aspetu oioin, inklui iha vida sosiál, polítika, militár tantu iha kapitál no mós iha nível lokál. Dinámika hirak-ne’e la’ós de’it kulmina iha konflitu armadu interna ne’ebé mak violentu tebes iha istória moderna timoroan nian, maibé mós sei iha ninia implikasaun to’o ohin loron.
Tan ne’e iha tinan 50 momentu istóriku 25 Abríl ida ne’e, sai momentu importante atu bolu filafali ita-nia memória, halo reflesaun atu komprende dinámika situasaun sira iha momentu ne’ebá, ema nia esperiénsia, esperansa, no deseju sira iha ambitu mudansa boot ida-ne’e, ne’ebé lori ba asaun partikulár sira ne’ebé mak marka ita-nia istória.
Centro Chega!I.P nu’udar Instituisaun Memória ne’ebé mak hakarak transforma memória pasadu sai hanesan lisaun aprendijazen ba harii pas no rekonsiliasaun, inisia konferensia ho tema “Tinan 50 Momentu Istóriku 25 Abril Refleksaun Kona-ba Deskolonizasaun iha Timor-Leste 1974-1975”, ida-ne’e nu’udar espasu ba reflesaun no diálogu interjerasionál hodi hamosu sensu, empatia no kompaisaun ba harii dame no rekonsiliasaun.
(Media CNC)
