Ainaro – (13 Agustu 2024)), Centro Nacional Chega! Instituto Publiku (CNC I.P) liu husi Xefe Departementu Divizaun Servisu Reparativu (DSR), Chiquito da Costa Guterres hala’o ona monitorizasaun ba atividade grupu Vitíma ka Sobrevivente Esperansa Futuru Mauchiga (EFM), iha Suku Mauchiga, Postu Administrativu Hatobuiliku, Munisipiu Ainaro.
Objetivu husi monitorizasaun ne’e mak atu hatene grupu Sobrevivente Esperansa Futuru Mauchiga (EFM) nia atividade negosiu ho nia progresu no dezafiu sira, atu garante nafatin sustentabilidade atividade negosiu hodi fo benefisiu ba membru no familia.
Iha tinan 2023, CNC I.P apoiu grupu Esperansa Futuru Mauchiga liu husi Asosiasaun Chega! ba Ita (ACbIt) ho montante orsamentu $2,000.00 hodi hala’o atividade negosiu kiik hanesan, Kuda modo, Suku hena Bordafo, Burset, Rai osan no Empresta osan.
Hafoin DSR halo monitorizasaun iha tereñu nota katak, grupu ne’e nia atividade iha progresu tanba membru sira, alende halo atividade grupu nian, sira mos empresta osan hodi hala’o atividade negosiu individu hanesan, hakiak manu, hakiak fahi, kuda modo no loke kios hodi kontribui ba ekonomia familia. Husi atividade hirak ne’e, grupu iha ona osan funan grupu nian hamutuk $ 280.00.
Iha oportunidade ne’e, Xefe Grupu Esperansa Futuru Mauchiga (EFM), Ana Maria de Orleans hato’o agradesimentu ba CNC I.P tanba bele mai halo monitorizasaun ba atividade grupu atu bele hatene progresu no dezafiu sira no mos enkorajen sira atu kontinua dezenvolve grupu ne’e ba oin.
“Ami orgullu tebes ba Chega! nia prezensa hodi halo observasaun ba ami nia atividade grupu. Ida ne’e hanesan korajen ida ba ami atu bele la’o ba oin ho di’ak,” esplika Xefe Grupu Esperansa Futuru Mauchiga (EFM), Ana Maria.
Enkuantu, CNC I.P liu husi DSR halo monitorizasaun ba grupu Sobrevivente EFM hola parte iha atividade “Apoiu Hakbiit Ekonomia Sobrevivente”. Atu fo hanoin fali katak, CNC I.P asina akordu ho grupu Sobrevivente EFM iha fulan Dezembru 2023 no atividade negosiu foin hala’o durante fulan 7 nia laran, maibé konsege hetan osan funan tanba kontribui husi membru sira.
Tuir planu DSR sei halo tan monitorizasaun ba grupu sira seluk hanesan, grupu Galagina Salele, Munisipiu Covalima, Grupu Sikone RAEOA, Grupu Maquelab RAEOA, Grupu Matadalan Kaibada Munisipiu Baukau.
Entertantu, grupu hirak ne’ebé CNC I.P apoiu bazeia ba rekomendasaun sira husi relatóriu Chega! no PMAS ko’alia kona-ba asuntu reparasaun ba vítima ka sobrevivente “Vítima husi funu nian tenke hetan atensaun hodi sira bele ultrapasa vida vulneravel sira, husi aspeitu sosial no ekonomia”. Reparasaun ne’e sei hala’o husi Estadu Timor-Leste halo reparasaun ba vítima ka sobrevivente sira ne’ebé iha períodu rezisténsia nian sofre ba desumanu husi ka sira nia direitu violadu” no nu’udar asaun ka forma ida ba kontribui imediata atu hakmaan todan ida sobrevivente vulneravel liu sira nian.
(Media CNC)
