(Likisa, 07 Agusto 2024) Diretór Ezekutivu Centro Nacional Chega! Instituto Publiku (CNC I.P), Hugo Maria Fernandes no Reitor Instituto São João de Brito (ISJB), Pe. Isaías Abílio Caldas, SJ asina Nota Entendementu, no akompaña husi Diretór Nasional Kuríkulu Ensinu Superior Ministeriu Ensinu Superior Siensia no Kultura (MSSK), Alcino Barreto João, ne’ebé realiza iha Kampus ISJB, Casait, Munisipiu Likisa.
Objetivu husi Nota Entendementu, atu hametin kooperasaun servisu hodi implementa rekomendasaun sira husi Relatóriu CAVR (Comissão de Acolhimento, Verdade e Reconciliação) Chega!, no mos Relatóriu CVA (Comissão Verdade e Amizade) Per Memoriam Ad Spem iha área edukasaun ba dame, istória liu-liu integrasaun modulu Chega! iha kurrikulu, atividade ensinu aprendizajen no mos realizasaun workshop, konferensia no palestra ne’ebé iha relasaun ho servisu CNC! I.P nian.
Objetivu seluk husi Nota Entendementu mak, atu estabele kolaborasaun hodi integra modulu Chega! iha kurrikulu edukasaun ba dame iha ISJB. Estabelese kolaborasaun hodi hadiak kualidade edukasaun iha área edukasaun ba dame, liu-liu kolaborasaun iha área metodolojia hanorin. Estabelese kolaborasaun hodi envolve profesor ISJB iha formasaun ne’ebé fasilita husi CNC! I.P. Estabelese koordenasaun regulár hodi realiza atividade extra-kurrikular hanesan seminariu, palestra, konferensia no visita sitiu istoriku no partisipa atividade seluk sira ne’ebé parte rua dezenvolve.
Kooperasaun ne’e foku mos ba área sira mak hanesan, kolabora hodi fahe koñesimentu no experiensia ba malu kona-ba metodolojia hanorin no kurrikulu kona-ba edukasaun ba istória no edukasaun ba dame nian. Kolabora hodi asegura partisipasaun profesor husi ISJB iha formasaun kona-ba modulu Chega!. Kolabora hodi organiza atividade hanesan konferensia, seminariu, palestra no atividade seluk. Área Kooperasaun sira seluk sei determina bazeia ba konkordansia.
Iha Nota Entendmentu ne’e, parte rua sei hamosu grupu tékniku hamutuk ba monitorizasaun no avalisaun, hafoin asina Nota Entendimentu ida ne’e, kompostu husi membru husi ema nain 4, 2 husi CNC! I.P no 2 husi ISJB hodi tau matan ba implementasaun husi Nota Entendimentu ida ne’e, ho mos kbit hala’o atividade monitorizasaun no avaliasaun ba Nota Entendimentu ida ne’e, ne’ebé sei hala’o periodikamente, dala ida iha tinan ida nia laran tuir exijensia ka nesesidade haruka.
Enkuantu, Nota Entendementu ne’e hala’o bazeia ba misaun CNC! I.P nian mak promove implementasaun rekomendasoens sira husi relatoriu Chega! husi CAVR relativamente ho institusionalizasaun memória no promosaun direitus umanus liu husi edukasaun, formasaun no solidariedade ba sobreviventes mais vulneraveis husi violasaun direitus umanus, nune’e mos promove implementasaun rekomendasaun sira entre CAVR no CVA kona-ba Reparasaun, Memorializasaun, estabelesementu Sentru Nasionál Memória, Pesquiza no Aprendizazen tuir kna’ar no mandatu ne’ebé hatur ona iha dekrteu lei n.o 48/2016, artigu 7.o Colaboração com outras Entidades, temi iha número 3 no junta hamutuk hó artigu 6.o Competências, espesifika iha alínea b no j) husi lejislasaun ne´ebé aprova estatuto husi CNC! I.P.
Nune’e mos, bazeia ba Despacho Ministerial n.o 02/GM/MESCC/I/2022, Ministeriu Ensinu Superior fo Lisensiamentu Operasional ba Instituto São João de Brito hanesan estabelesimentu ensino superior privadu, ho tipu Instituto Universitariu liu husi despacho Ministerial n.o 072/GM/MESCC/XII/20219. IJSB hanesan instituisaun lider ba formasaun profesor no sai hanesan sentru formasaun no edukasaun ba paz hodi guia feto no mane foinsa’e sira atu forma rekursu umanu ne’ebé kualifikadu ho kualidade ne’ebé reflete iha lealdade, integridade, inklusiva, onestidade, responsabilidade iha área ne’ebé sira estuda ba. ISJB asume kna’ar krusial iha promosaun ba dame ida ne’ebé duradoura. Hadiak edukasaun ba dame hanesan estratejia global, rejional, nasional no lokal hodi hetan dame ida ne’ebé metin ba tempu naruk.
(Media CNC)
