Díli – (11 Jullu 2025), Centro Nacional Chega!I.P asina ona Nota Entendementu (NE)/Memorandum of Understanding (MoU) ho Universidade Oriental Timor Lorosa’e (UNITAL) atu hametin kooperasaun servisu iha área edukasaun. Serimonia ofisializasaun NE ne’ebé realiza iha edifisiu Centro Chega!I.P, Antigo Comarca Balide, iha ámbitu Selebrasaun Aniversáriu Centro Nacional Chega!I.P ba dala-8 no Festivál Kultura Rezisténsia Populár ba dala-5 ho tema “Memória Koletiva Dalan ba Rekonsiliasaun”.

Dokumentu ofisial ne’e, asina husi Diretór Ezekutivu Centro Nacional Chega!I.P, Hugo Maria Fernandes ho Reitór Universidade Oriental Timor Lorosa’e (UNITAL), Dr. Claudino Ninas Nabais, Ph.D.

Objetivu prinsipal husi NE, mak atu estabelese kolaborasaun hodi integra Modulu Chega! iha kurrikulu edukasaun ba dame iha UNITAL. Estabelese kolaborasaun hodi hadi’ak kualidade edukasaun iha área Edukasaun ba Dame, liu-liu kolaborasaun iha área Metodolojia Hanorin. Estabelese kolaborasaun hodi involve profesor UNITAL iha formasaun ne’ebé fasilita husi Centro Chega!I.P. Estabelese koordenasaun regulár hodi realiza atividade extra-kurrikular hanesan semináriu, palestra, konferensia no visita sítiu istóriku sira no mos partisipa atividade sira seluk ne’ebé parte rua dezenvolve.

NE foka ba área kooperasaun servisu hanesan, kolabora hodi fahe ba malun koñesementu no experiensia kona-ba metodolojia hanorin no kurikulu kona-ba Edukasaun ba Dame, Istória, Direitus Umanus no Justisa Tranzisional nian. Kolabora hodi asegura partisipasaun profesor husi UNITAL iha formasaun kona-ba Modulu Chega!. Kolabora hodi organiza atividade hanesan semináriu, palestra, konferensia no atividade sira seluk ne’ebé instituisaun rua ne’e organiza.

Implementasaun akordu NE teknikamente sei regula iha akordu kooperasaun ketak ida ne’ebé sei halo entre parte rua nu’udar baze ba NE. Durasaun NE validu ba tinan 3 hahú husi loron ne’ebé parte rua asina. NE bele hanaruk nia tempu, bele muda ka hafoun ninia konteudu tuir nesesidade no bele mos hakotu liu husi akordu eskritu husi parte rua.

Konteudu husi NE esplika mos kona-ba ajustamentu ka alterasaun ruma ba NE, presija ho atensaun nafatin ba pontu sira no prinsipiu sira ne’ebé konkorda tiha ona. Wainhira parte ida husi parte sira hakarak atu muda, hanaruk ka hakotu NE ida ne’e, mak parte interesadu sira iha obrigasaun atu fo hatene fulan tolu, molok halo alterasaun ka mudansa ruma.

Konsiderasaun Centro Chega!I.P ho UNITAL

Konsiderasaun: Tuir Misaun CNC! I.P mak promove implementasaun rekomendasoens sira husi relatóriu Chega! husi Comissão de Acolhimento, Verdade e Reconciliação (CAVR) relativas ho institusionalizasaun memória no promosaun direitus umanus atraves edukasaun, formasaun no solidariedade ba sobreviventes mais vulneraveis husi violasaun direitus umanus, nune’e mos promove implementasaun rekomendasoens komuns entre CAVR no Comissão de Verdade e Amizade (CVA) kona-ba Reparasaun, Memorializasaun, estabelesementu Sentru Nasionál Memória, Pesquiza no Aprendizajen tuir kna’ar no mandatu ne’ebé hatur ona iha dekretu lei 48/2016, artigu 7. Colaboração com outras Entidades, temi iha número 3) no junta hamutuk ho artigu 6.” Competências, espesifika iha alinea b) no j) husi lejislasaun ida ne’e, ne ebé aprova Estatuto husi CNC! I.P.

Konsiderasaun: Despacho Ministerial no.164/ANAAA-MESCC/XI/2019, Ministério Ensino Superior Ciência e Cultura fo Lisensiamentu Operasional ba Universidade Oriental Timor Lorosa’e (UNITAL) hanesan estabelesimentu ensino superior privadu, ho tipu Instituto Universitariu liu husi despacho Ministerial no. 73/2019, Universidade Orientál Timor Lorosa’e (UNITAL) hanesan Universidade privada husi instituïsaun ensinu superior ne’ebé hari’i husi Fundasaun Oriental Timor Lorosa’e (FORTIL). Universidade sai sentru aprendizajen ida hodi forma Timoroan sira hotu atu sai rekursu humanu ne’ebé kualidade, profisional, integridade, inklusiva, onestidade, lealdade, responsabilidade, trasformativu, ho hanoin ne’ebé inovativu atu responde ba dezenvolvimentu nasaun nian.

Detallu informasaun klik: KOMUNIKADU IMPRENSA CNC-UNITAL ASINA NE