Díli – (11 Jullu 2025), Centro Nacional Chega!I.P asina ona Nota Entendementu (NE) Memorandum of Understanding (MoU) ho French Cooperation. Objetivu prinsipal husi Nota Entendementu ne’e mak atu servisu hamutuk ba iha programa kultura no edukasional.
Dokumentu ofisial ne’e asina husi Diretór Ezekutivu Centro Nacional Chega!I.P, Hugo Maria Fernande ho Reprezentante French Cooperation iha Timor-Leste, Julie Brown, ne’ebé realiza iha edifisiu Centro Chega!I.P, Antigo Comarca Balide, iha ámbitu Selebrasaun Aniversáriu Centro Nacional Chega!I.P ba dala-8 no Festivál Kultura Rezisténsia Populár ba dala-5 ho tema “Memória Koletiva Dalan ba Rekonsiliasaun”.
Programa prioridade ne’ebé sei halo mak hanesan programa kultura no edukasional. Iha programa kultura, parte rua sei koopera,liliu iha exibisaun filme fransés ne’ebé iha relasaun ho istória, direitus umanus no justisa transitóriu ba estudante no joven sira atu sira bele aprende tanba filme nu’udar janela koñesimentu ne’ebé asesivel ba timoroan sira. Programa edukasional ne’e, parte rua sei dezenvolve hamutuk liu husi involvimentu estudante universitáriu sira iha aprendizajen istória no direitus umanus.
Akordu kooperasaun ne’e validu ba tinan 3 hahu husi (2025-2028) no servisu sira ne’ebé sei halo mak kona-ba área sira kooperasaun nian foka ba dezenvolvimentu no implementasaun projetu hamutuk. Kooperasaun téknika no finanseira. Troka esperensia, koñesimentu no informasaun sira. Hasa’e kapasidade no atividade treinamentu. Enkuadramentu sira monitorizasaun, avaliasaun, no relatóriu nian.
Akordu ida ne’e ezije responsabilidade parte rua nian konkorda atu dezigna pontu fokál sira hodi fasilita komunikasaun no koordenasaun. Partisipa iha konsulta regulár sira hodi haree fila fali progresu. Fornese rekursu no parseria, sujeitu ba disponibilidade no akordu mútua, respeita prinsípiu sira kona-ba transparénsia no responsabilidade.
Konteudu husi NE ne’e, sita mos propriedade intelektuál no konfidensialidade ne’e signifika propriedade intelektuál hotu-hotu ne’ebé dezenvolve hamutuk tuir akordu ne’ebé iha sei fahe ba parte rua atu mantein konfidensialidade husi informasaun durante kolaborasaun.
Detallu informasaun klik:KOMUNIKADU IMPRENSA CNC-FC
