Díli – (10 Juñu 2025), Diretór Ezekutivu Centro Nacional Chega!I.P, Hugo Maria Fernandes partisipa serimonia komemorasaun loron Levantamentu Marabia ba dala-45 (10 Junu 1980 – 10 Junu 2025) ho tema “Transmite Memória Koletiva hodi Konstrui Identidade ba Libertasaun Konsiénsia hodi Konstrui iha Futuru”.

Iha seremonia ne’e, Diretór Ezekutivu hato’o diskursu no destaka levantamentu marabia nu’udar levantamentu dahuluk iha istória Timor-Leste nian, no levantamentu ne’e akontese tanba iha kooperasaun servisu entre frente armada no frente klandestina.

Husi akontesimentu levantamentu Marabia, rezulta forsa Indonézia oho ema hamutuk 120, iha primeiru operasaun Tentara Nasional Indonézia (TNI) nian ba levantamentu ne’e kaer (Kaptura) ema hamutuk 600 lori hotu familia husi ema sira ne’ebé involve iha levantamentu ne’e ba kastigu iha Atauru.

Diretór argumenta,  akontesimentu levantamentu Marabia hatudu kontribuisaun komunidade suku Lahane Osidental nian ba prosesu luta ba ukun rasik-an. Atu istória ne’e labele lakon husi jerasaun ba jerasaun mak iha tinan hirak ne’e, Centro Chega!I.P hakerek no publika ona istória suku Lahane Osidental nian para komunidade sira bele aprende. Servisu ne’e halo bazeia ba kna’ar Centro Chega!I.P nian mak prezerva memória pasadu halo memória ne’e asesivel ba ema atu aprende.

Levantamentu Marabia nu’udar istória importante Timor-Leste nian tanba ne’e Timoroan sira presiza aprende istória tanba istória mak ita nia identidade. Se ita laiha istória mak ita laiha identidade.

Enkuantu, komemorasaun levantamentu Marabia kompleta ho atividade sira hanesan, seminariu, misa no kari’i aifunan iha monumentu levantamentu Marabia no seremonia partisipa husi Sekretáriu Estadu Veteranu (SEV), Cesar dos Santos da Silva “Merak”, Autoridade Seguransa, Autoridade Lokal, Asosiasaun Vitima, família martires no seluk tan.

Media Chega!.