Suai – (03 Setembro 2025), Komisaun organizadora ba Komemora Masakre 6 Setembro Negro Suai 1999 ba dala-26 kompostu hosi Centro Nacional Chega!I.P, Autoridade Munisipiu Covalima, Párokia Igreja Nossa Senhora de Fátima Suai, Muzeu Memórial Munisipal Covalima (MMMC), vitima no sobrevivente, estudante no komunidade sira hala’o atividade prosisaun hahú hosi Aeroportu Suai to’o iha Monumentu Masakre Setembro Negro Suai 1999.

Iha prosisaun ne’e, lori estatua Nossa Senhora de Fátima, lori Kruz Jesus no lori mos baner ida ne’ebé hakerek ho liafuan “Hanoin Hikas Masakre 6 Setembro 1999 Povu Covalima 134 Inklui Pe. nain 3 ne’ebé Nakfilak ba Setembro Negro”. Proseisaun ne’e la’o durante oras 4 nia laran akompaña reza no kanta no hetan seguransa hosi autoridade Polisia Nasional Timor-Leste Munisipiu Covalima.

Hafoin remata proseisaun, Padre Pároku Igreja Nossa Senhora de Fátima Suai, Pe. Aderito da Costa Vilar Morreira esplika, igreza katolika liu hosi Párokia Igreja Nossa Senhora de Fátima Suai hamutuk ho komisaun organizadora organiza atividade prosisaun lori figura nain feto tanba nain feto hanesan inan ne’ebé bele lori ita ba Maromak no ita hasaran matebian sira ne’e ba ita nain feto para bele hetan perdaun ba sira nia sala liu hosi maromak nia intersesaun.

Ita nia Istória luta ba ukun rasik-an involvimentu uma kreda nian maka’as tebes. Iha situasaun difisil  ta nia lider sira fiar katak ita sei hetan indepéndensia. Ita hetan ona indepéndensia ita atu komemora Masakre ne’e atu hafanu sarani sira oinsa sira iha sentimentu no iha sensibilidade.

“Ita halo proseisaun ida ne’e, fanu sarani sira liu-liu jerasaun foun atu hatene, atu komprende katak ita nia ukun-an ida ne’e ita sosa ho mate, ho Nain Lulik nain 3 no sarani sira vida ho ruin no ran”, dehan Pe. Aderito.

Prezidente Autoridade Munisípal Covalima foun, Miguel Armada Cardoso reforsa katak, prosisaun ne’e nudar sakrifisiu ida ba ita nia eroi sira ne’ebé dedika-an hodi sosa indepéndensia ne’e. Ita hatenen katak Pe. Nain 3 hamutuk ho sarani sira mate iha igreza Ave Maria Suai. Ho prosisaun ne’e fo ondra ba sira no hanorin jerasaun foun atu labele haluha Masakre Setembro Negro.

Media Chega!.