Dili-Diretór Ezekutivu Centro Nacional Chega!I.P, Hugo Maria Fernandes apela ba joven sira atu kontinua lori no implementa valór uluk solidariedade, responsabilidade no servisu hamutuk iha tempu agora tanba valor sira ne’e importante.

Tanba ne’e, agradese ba organizasaun Rotary Youth Lidership Awards Timor-Leste (RYLA-TL) ba inisiativa di’ak halibur joven sira mak durante ne’e iha kapasidade, abilidade di’ak hakarak halo kontribuisaun ba sira nia-an liu husi servisu sosiál hodi hariku (enriqueça) sira nia kapasidade kontribui ba nasaun ida ne’e.

“Uluk iha solidariedade ba buat seluk, agora tenke iha solidariedade iha transformasaun, iha situasaun ida ne’e, ba servisu sosiál, ba atividade, ba apoiu ema ne’ebé presiza”, informa Hugo bainhira sai oradór ba konferensia ho Tema “Enablin Extraordinary Lidership”, organiza husi RYLA-TL,  salaun Unio Maloa Training Center Semináriu Ailok-Laran, Dili, Sexta-feira, (14/01/2022).

 Enkuantu, Topiku ne’ebé komisaun organizadór oferese ba Diretór Ezekutivu ko’alia kona-ba “Progresu no Dezafiu Implementasaun Rekomendasaun CAVR no CVA Iha Timor-Leste”. Iha aprezentasaun, Diretór introduz kona-ba mandatu CNC no progresu servisu mak durante ne’e halo ona no ba oin sei servisu di’ak liu tan.

Diretór RYLA-TL, Jeronimo Pereira Afonso da Costa agradese ba CNC ne’ebé fahe ona esperensia no informasaun kona-ba mandatu CNC ba implementasaun CAVR no CVA no mos istória Timor-Leste nian ba joven sira atu bele aprende.

Partisipante, Antonina dos Santos sente kontente rona esplikasaun kona-ba istória Timor-Leste tanba hanesan joven presiza hatene istória tanba istória mak nudar ita nia identidade.

Hafoin termina aprezentasaun, ekipa RYLA-TL tara tais ba orádor nudar lembransa ida. No mos entrega uma lisan, foto no vizita fatin ezibisaun kona-ba atividade sira mak durante ne’e RYLA-TL halo. Enkuantu, partisipante iha konferensia ne’e hamutuk 86 kompostu feto 43 no mane 43. No konferensia ne’e la’o durante semana ida.

Media Chega!