Dili – (30 Agusto 2025), Centro Nacional Chega!I.P reprezenta hosi Nelson Miranda Seixas, Sekretáriu Estadu ba Asuntu Antigu Kombatente Libertasaun Nasionál no Veteranu, Cesar dos Santos da Silva ‘Merak’, Koodenadór Nasional Asosiasaun Vitima Konflitu Politiku 1974-1999, Domingos P. De Araújo Moniz hamutuk ho familia vitima no sobrevivente sira halo inagurasaun Monumentu Memórial Masakre Quintal Ki’ik 10 Maiu 1999, ne’ebé lokaliza iha Suku Santa Kruz, Postu Administrativu Nain Feto, Munisipiu Dili.

Relasiona ho inagurasaun ne’e, Familia vitima no Sobrevivente sira hato’o agradesimentu ba governu liu hosi Centro Chega!I.P tanba fo ona apoiu ba konstrusaun Monumentu Memórial Masakre Quintal Ki’ik 10 Maiu 1999 no hetan ona inagurasaun, iha ámbitu komemorasaun loron Konsulta Populár 30 Agusto ba dala-26.

Sobrevivente Masakre Quintal Ki’ik 10 Maiu 1999, Manuel Saldanha hato’o “Hau sente orgullu tebes tanba Memórial ida bele hamrik iha fatin ida ne’e. Nu’udar familia no vitima hotu agradese ba governu ida ne’e liu hosi CNC bele apoiu realiza memorial ida ne’e”.

Monumentu ne’e harii ba sira ne’ebé mak mate iha Quintal Ki’ik tanba oho hosi Militar Indonézia hamutuk ho Milisia Pro-integrasaun sira tanba de’it defende ukun rasik-an. Monumentu ne’e harii atu tinan-tinan halo komemorasaun para jerasaun ba jerasaun labele haluha.

Romeio Duarte da Costa nu’udar maun hosi matebian Cezaltino da Costa haktuir, tuir lolos nia (Romeio) mak mate uluk tanba Militar Indonézia no Milisia Pro-integrasaun terjetu ona nia atu oho maibé lakonsege, ikus mai nia alin mak sira oho. Ho monumentu ida ne’e, hanesan maun hato’o agradesimentu ba Centro Chega!I.P tanba bele apoiu hodi harii Monumentu memória.

Sekretáriu Estadu ba Asuntu Antigu Kombatente Libertasaun Nasionál no Veteranu, Cesar dos Santos da Silva ‘Merak’ esplika, Monumentu Memórial Masakre Quintal Ki’ik 10 Maiu 1999 hanesan Monumentu Lulik, Monumentu Memória Viva no Eterna tanba ne’e husu asegura atu jerasaun ba jerasaun labele haluha istória luta ba ukun rasik-an.

“Ida ne’e sai memórial ida ne’ebé istoriku tebtebes i husu ita boot sira konserva no prezerva memória koletiva ida ne’e. Imi hamutuk bele hakerek istória 10 de Maiu 1999”, Sekretáriu Estadu rekomenda ba komunidade sira iha Aldeia Quintal Ki’ik.

Entertantu, serimonia inagurasaun Monumentu Memórial Masakre Quintal Ki’ik hetan mos partisipasaun hosi autoridade lokál, komunidade no entidade sira seluk no hetan apoiu finansiamentu hosi Centro Chega!I.P.

Media Chega!.