Ótel Turismu nu’udar Ótel Antigu Português nian ne’ebé lokaliza iha Avenida Direitus Umanus, Lesidere munisípiu Dili. Durante okupasaun Indonézia nian iha loron 17 Janeiru 1990, embaixadór Estadus Unidus Amerika nian iha Jakarta Sr. John Monjo halo vijita mai Timor-Leste ho misaun ida atu buka lia loos kona-ba alegasaun ne’ebé hateten katak hafoin demonstrasaun ne’ebé akontese iha vijita Amu Papa João Paulo II iha tasi-tolu akontese detensaun no tortura ba manifestante sira.

Nune’e iha 17 janeiru 1990, juventude kuaze ema na’in 100 ne’ebé lidera husi Gregorio Saldanha halo manifestasaun hasoru embaixadór Estadus Unidus Amerika nian ne’ebé hela iha Ótel Turismu. Iha manifestasaun ne’e manifestante sira husu ba embaixadór atu sai mai liur hodi rona petisaun ne’ebé sira prepara tiha ona, embaixadór sai duni ba liur hodi hasoru no ko’alia liu husi megaphone ida ho manifestante sira durante oras ida nia laran. Antes ne’e manifestante sira hakilar ona ho slogan kontra okupasaun Indonézia no prepara ona deklarasaun eskrita ne’ebé dirije no husu ba ONU atu hala’o referendum ida kona-ba Timor-Leste nia Estatutu Politiku.

Durante manifestasaun ne’e la’o Militar Indonézia sira ne’ebé uja roupa sivíl hodi subar sira nia identidade loloos hodi observa no halo dokumentasaun hanesan hasai demonstrante sira nia fotográfia, halo gravasaun video no hakerek manifestante sira nia naran. Hafoin Embaixadór husik Ótel ne’e polisia husi unidade Anti vândalos (Anti huru-hara) komesa baku no kaptura manifestante sira.