Covalima – (11 Outobru 2025), Centro Nacional Chega!I.P, Sekretariu Estadu Arte no Kultura (SEAK), Ministeriu Juventude Desportu Arte no Kutlura (MJDAK), Ministeriu Administrasaun Estatal (MAE) no Autoridade Munisipiu Covalima organiza Festivál Fronteira 2025 ho tema “Interkambiu Kultural ba Hametin Rekonsiliasaun”.
Relasiona ho atividade Festivál Fronteira ne’ebé realiza ona ba dala-3, tuir mai ami sei aprezenta komunidade sira nia hanoin ba atividade Festivál Fronteira ho nia vantajen ba komunidade sira ne’ebé partisipa ona.
Tuir Ketua Sangar Seni Albert hosi NTT, Via Nel D. Nahak katak, durante ne’e partisipa ona eventu Festivál Fronteira ba dala-3 hahu hosi Munisipiu Bobonaro, Oekuse no Covalima. Festivál ne’e di’ak tebtebes.
Nia reforsa, Festivál ne’e di’ak tanba bele Grupu Dansa Kultura hosi NTT Sangar Seni Albert partisipa. Liu hosi Festivál ne’e bele hametin relasaun dame entre Timor-Leste no Timor Osidental no mos promove kultura.
“Ami tuir dala-3 ona Maliana, Oekuse no Covalima. Ami mai aprezenta dansa kultura ho titulu ko’a haree. Tuir hau nia haree Festivál Fronteira ne’e di’ak tebes, iha valor pozitivu, hametin relasaun dame. Ami iha lina fronteira mai iha Timor-Leste, ami bele hasoru maun sira, bin sira iha ne’e, iha rekonsiliasaun. Atividade Festivál ne’e di’ak presiza kontinua”, dehan nia.
Joven hosi Grupu Buka Rasik, Dalia Lalului Vieira esplika, Festivál Fronteira ne’e di’ak tebes tanba bele loke feira hodi faan sasan. Liu hosi Festivál ne’e bele hametin paz no dame.
“Ami sente kontente tanba loron hira nia laran ne’e ami bele hetan osan. Festivál fronteira ne’e di’ak tanba fasilita ami bele faan sasan. Ami faan asesoris sira, tais mane no tais feto no pasta ho modelu tais, faan mos korente. Rendimentu loron ida hetan $ 120”, dehan nia.
Lia Na’in Kamanasa, Anacleto Amaral esplika, Festivál Fronteira ne’e di’ak tebes tanba bele halibur Timoroan sira hasoru malu. “Hau sente kontente tanba ida ne’e mak halibur ema hotu-hotu, halibur lia nain hosi Timor-Leste no lia nain hosi Timor Osidental hamutuk, ida ne’e foin primeira vez”.
Media Chega!.
