Hafoin insuresaun armada iha loron 10 fulan junhu 1980, Militar Indonézia husi bataliaun 744 halo kedan operasaun hodi kaptura no oho ema sira ne’ebé involve direita no ema sira ne’ebé mesmu la involve maibe sira deskonfia iha ligasaun ho akontesimentu ne’e. Nune’e iha loron 12 fulan Juñu, loron rua tuir mai tropa Indonézia husi bataliaun 744 halo operasaun no oho ema barak iha área sira ne’ebé lokaliza besik akonteseimentu, inklui akontesimentu ne’ebé akontese iha Kuluhun ne’ebé tropa Indonézia husi Bataliaun 744 kaptura ema nain 8 ne’ebé halai husi Aituri Laran ho Mota Ulun hodi ba subar iha Kuluhun hafoin akontesementu ne’e. Ema nain 8 ne’ebé kapturadu mak Vidal Soares, Domingos Soares, Bere Mali, Bere Mali Soares, Gaspar Araújo, Maurais, Bere Loek ho Gaspar.

Hafoin halo kapturasaun iha loron ne’e kedan tropa Indonézia sira husi bataliaun 744 oho kedan sira no soe sira nia mate isin iha fatin ida naran fatu banko/Fatu ahi ne’ebé lokaliza iha dalan entre entre Bekora ho Hera. Aleinde nain 8 ne’ebé sira oho, Militar Indonézia husi bataliaun 744 mos kaptura ema nain 40 iha Suhu-Rama (Inur Fuik, Nain Feto, parte Leste-Dili) hodi ba detein iha Hera no obriga sira halo servisu forsadu durante loron hat nulu nia laran i ikus mai Militar Indonézia lori detenadu sorin baluk husi detenadu nain 40 ne’e ba oho iha fatin ida ne’e.