Dili – Embaixada Alemaña apresia servisu estrutura ezekutivu no funsionáriu tomak Centro Nacional Chega!I.P tanba hatudu kualidade servisu.
Apresiasaun ne’e hato’o liu hosi Konselleru Asuntu Polítika Embaixada Alemaña, Dra. Verena Frick hafoin remata enkontru ho Diretór Ezekutivu Centro Chega!, Hugo Maria Fernandes ne’ebé akompaña husi Diretór Divizaun sira.
Enkontru entre Diretór Ezekutivu, Hugo Maria Fernandes ho Konselleru Asuntu Polítika Embaixada Alemaña, Dra. Verena Frick ko’alia kona-ba komitmentu apoiu Embaixada Alemaña nian ba moderniza arkivu Centro Chega!.
Remata enkontru, Diretór Ezekutivu Hugo Maria Fernandes tara tais ba Konselleru Asuntu Politika Embaixada Alemaña, Dra. Verena Frick nu’udar simbolu agradesimentu.
Dra. Verena mós kontinua halo vizita ba ezibisaun istóriku sira iha Centro Chega! mak hanesan Ezibisaun kona-ba prizasaun no prizoneiru polítiku, ezibisaun kona-ba kronolojia istória 1974-1999, ezibisaun kona-ba servisu CAVR, ezibisaun kona-ba auto determinasaun no komunidade internasionál, ezibisaun kona-ba akontesimentu 1999, ezibisaun kona-ba direitus umanus no ikus sela nakukun.
Iha vizita ne’e, Konselleru Asuntu Polítika Embaixada Alemaña, Dra. Verena Frick informa, Centro Chega! nia ezistensia importante tebes tanba ko’alia kona-ba Chega! katak para ona ka to’o ona ba violensia.
“Hau haree ema hotu ne’ebé servisu iha ne’e (Centro Chega!) ho komitmentu ne’ebé di’ak no sira halo Servisu ida ne’ebé makas tebes”, dehan Dra. Verena ba media Chega! bainhira remata vizita iha Antigo Comarca Balide, Dili, Kinta-feira (17/03/2022).
Dra. Verena enkoraja, funsionáriu sira atu kontinua hatudu komitmentu servisu ne’e ho di’ak no kontinua prezerva istória ne’e ho di’ak tanba istória importante ba ema hotu atu bele aprende hodi halo reflekasaun nune’e ba futuru labele akontese tan.
“Ha’u hanoin istória importante tebes tanba ita bele hatene saida mak akontese iha pasadu”, nia konsidera.
Durante vizita, Dra. Verena dehan, “Iha vizita ne’e ha’u haree imajen no fatin ne’ebé forsa tebetebes. Hau sente informasaun sira ne’e kona ha’u nia fuan no kona ha’u nia laran. Ho violensia ne’ebé iha. Ita sempre iha esperansa no liu hosi ezibisaun ne’e bele hanorin ema hotu atu labele repete tan. Chega! para ona, to’o ona”, dehan Dra. Verena.
Media Chega!
